02 marsa — Raha lazaina ny tantaran'i Masindahy Charles le Bon dia zanak'i Knut, mpanjaka tao Danemark tamin'ny taonjato faha-11. Ny taona 1119 no notendrena ho comte tao Flandre i Charles rehefa tafaverina avy any amin'ny ady voalohany ho fanafahana ny Tany masina.
Nandritra ny fotoana nitantanany dia nampanjaka ny fiandriampahalemana sy ny rariny i Charles ary anisan'ny nampiavaka azy ny fitiavany ny mahantra ka izay no niantsoana azy hoe Charles le Bon. Tsara fo sy tia vavaka izy ka noho izy toetrany izay dia nisy tsy nankasitraka azy sy nialona ny fampanjakany ny rariny izany, hany ka ny 02 marsa 1127 dia novonoin'ny tompomenakely iray tao amin'ny fiangonana Sait-Donatien tao Bruges i Charles. Vetivety foana dia najain'ny mponina ho martiry sy olomasina izy ka ny Papa Léon XIII no nanandratra azy ho olontsambatra ny taona 1883. Izy no mpiaro ireo comtes ary mivavaka ho an'ireo mahantra sy farahidiny ihany koa.
