16 oktobra, andro eran-tany ho an'ny sakafo. Mandray anjara goavana amin'izay famokarana sakafo izay ny famokarana tantanam-pianakaviana, dia ireo tantsaha 80% amin'ny mponina eto Madagasikara. Miantoka ny 60% amin'ny sakafo eto Madagasikara ny malagasy tantsaha. Miantsoroka ny 70% mahery amin'ny vokatra aondrana. Miantoka ny 26% amin'ny Famokarana Faobe eto Madagasikara na ny PIB ny sehatr'asan'izy ireo...

Manomboka manan-danja koa ankehitriny ny famokaran'ny tantsaha ny sakafo ara-biôlôjia. Manao ezaka mafy amin'ny fikarohana manatsara hatrany ny famokarana ireo mpikambana ao aminy ny fikambanana Lanja Miakatra. Izany no natao dia mba ahafahana manolotra sakafo tsara kalitao ho an'ny mpanjifa, anondrotana koa ny fiharian-karen'ny mpikambana ao aminy, amin'ny alalan'ny famokarana ara-biolojia tsy mampiasa taharo simika, hoy Andriamatoa Ranaivoarison Basile na i Papa Bio.

Azo atao tsara ny miady amin'ny fahantrana eny ambanivohitra, hoy i Papa Bio amin'ny fampiharana ny famokarana biôlôjika amin'ny alalan'ny fampiasana ny zezika kankana amin'ny famokarana. Hita taratra amin'ireo tantsaha mivondrona ao amin'ny Lanja Miakatra izany.