Hankalaza ny andron'ny 8 marsa, andro  iraisam-pirenena ho an'ny zon'ny vehivavy ny vehivavy. Tsy diso anjara amin'izany ny malagasy vehivavy tantsaha. Any Toamasina no hanaovana ny hetsika ôfisialy ; maro ny hetsika hanehoana izany... Maro ireo fikambanam-behivavy misiki-ponitra miantsehatra amin'ny fampivoarana ny famokarana any amin'ny toerana misy azy na ny famokarana tantanam-pianakaviana eto Madagasikara.

Tsy vitsy amin'izy ireny no misehatra amin'ny fiarovana ny tontolo iainana : FVTM sy ny FARM.

Lohalaharana amin'izay fampandrosoana ny eny ambanivohitra izay ny Federasiôn'ny Vehivavy Tantsaha eto Madagasikara na ny FVTM. Fikambanam-behivavy 600 mahery no mivondrona ao amin'ny FVTM. 22 taona izao no nijoroany. Antom-pisian'ny FVTM ny mampiofana ny vehivavy mikambana ao aminy, mampafantatra ny zony ary mampandray andraikitra azy ireo amin'ny maha olom-pirenena ny vehivavy tantsaha.

Fikambanana niorina taona vitsivitsy teo ho eo koa ny Femme en Action Rurale de Madagascar na ny FARM. Mamondron-kery miaro ny tontolo iainana sy mitaky ny rariny sy ny hitsiny amin'n lafiny rehetra ho an'ny vehivavy tantsaha ireo vehivavy miantsehatra eny ambanivohitra eto Madagasikara ireo.

Nisy ny hetsika nataon'ny FARM teto an-drenivohitra, nanentanana ny olon-drehetra tamin'ny alalan'ny Foara ho an'ny ekôlôjia mba handray andraikitra manoloana ny voka-dratsin'ny fiovaovan'ny toe-tany noho ny fiovaovan'ny toetr'andro amin'ny fiainan-janak'olombelona.

Source photo : Accueil Femmes Action Rurale de Madagascar.