Dingana maromaro no tsy maintsy lalovana rehefa hikolokolo ny fahasalamana ny olona. Ary tsy misy azo tsinontsinoavina avokoa izany. Raha tiana ny hahazo fahasitranana ao anatin'ny fotoana tsy dia maharitra rehefa mitsabo, dia tsy maintsy omena lanja avokoa ireo dingana maromaro ireo.
Fisorohana dingana voalohany
Ny fahasalamana no voalohan-karena hoy isika Malagasy, ary ny fikolokoloana azy dia adidy tsy maintsy tanterahan'ny olona rehetra manan'aina. Mandrakariva mantsy isika rehefa marary dia maika ny ho sitrana haingana, kanefa tsy mahavatra na tsy manome lanja izany fikolokoloana ny fahasalamana izany akory amin'ny fotoana tokony ilana azy. Na mbola salama aza dia tokony hanatanteraka ireto fisorohana ireto, fa tsy hiandry rehefa marary vao hihetsika.
- Misakafo ara-pahasalamana : ahitana ny hery fiasana, ny hery fiarovana, ny hery fanorenana, ny sira mineraly isan-karazany, ny fisotroana rano madio sy amin'ny fatrany ara-dalàna : 1 litatra sy tapany isan'andro farafahakeliny;
- Matory adiny valo farafahakeliny;
- Miala sasatra araka ny tokony ho izy;
- Mila mampiasa vatana kanefa tsy voatery hanao fanatanjahan-tena mahery vaika. Ny fandehanana tongotra ao anatin'ny 30 mn isanandro, na adiny telo isan-kerinandro da efa ampy;
- Mandrindra ny tontolo iainana : ny fahadiovana, ny filaminana, ny fifandraisana amin'ny hafa;
- Manatona mpitsabo eo akaiky rehefa misy tranga mampanahy.
Fisorohana dingana faharoa
- Rehefa marary ianao ka tonga eo anatrehan'ny mpiatsabo, dia mahazo fampianarana ianao hitandremanao mba tsy hiveranan'ny aretina intsony.
Fisorohana dingana fahatelo
- Raha sendra manana aretina mitaiza ianao dia ny mpitsabo ihany no afaka hitari-dàlana anao hahafahanao miaina miaraka amin'ny aretina mitaiza anao.
