Manao antso avo ny Malagasy Dairy Board na ny "MDB", mitaky ny tsy hankatoavan'ny Fitsaràna Avo momba ny Lalam-panorenana sy ny Filohan'ny Reôblika ilay lalàna vaovao momba ny fananan-tany, vao avy nolanian'ny solombavambahoaka, ny 30 jona teo. Ny MDB dia vondron'ireo mpisehatra amin'ny lalam-pihariana ronono eto Madagasikara.

Velom-panahiana ny amin'ny mety ho fahaverezan-jo amin'ny fisitrahana tany noho ity lalàna ity ny tantsaha. Maneho firaisankina tanteraka ary manohana ny antso avo efa nataon'ireo vovonam-pikambanan'ny tantsaha maro eto Madagasikara ny MDB manoloana ity toe-draharaha iray ity hoy Andriamatoa Rakotozafy Théophile, filan-kevim-pitantanan'ny MDB.

Vonona hifampidinika sy handray an-tanana amin'ny fampandrosoana ny firenena ny vovonam-pikambanan'ny tantsaha. Isan'ny voakasika amin'ity lalàna ity ny lalam-pihariana ronono. Manana ny mampiavaka azy mantsy ny mpisehatra momba ny fanamaitisa-molaly ny tany, hoy Andriamatoa Raveloarijaonina na Ravelo mpiompy ombivavy any Vakinankaratra, isan'ny mpikambana ao amin'ny filan-kevi-pitantanana.

Tsy niheno ny tantsaha ny fahefana mpanatanteraka sy ny fahefana mpano lalàna tamin'ny namolavola sy nandinika ity lalàna ity. Mbola tsy tara ny fitarainana ataon'ireo vovonam-pikambanan'ny tantsaha hoy Andriamatoa Rakotozafy Théophile, mpikambana ao amin'ny filan-kevi-pitantanan'ny MDB.

Nivory nandritra ny roa andro teto an-drenivohitra ny filan-kevit-pitantanan'ny MDB manerana ny nosy, ny 15 sy ny  16 jolay 2021 teo, nandinika ny fiainan'ny fikambanana amin'ny ankapobeiny, ny asa tanterahana ao amin'ny lalam-pihariana ronono ary ny momba ilay lalàna momba ny fananan-tany ka izao namoaka fanambarana iombonana izao.