Tapa-kevitra hamaky lalana vaovao, hamahana ny olana momba ny fifaneraserana ao aminy sy ny manodidina azy, ny kaominina ambanivohitra Antsapanimahazo distrikan’i Faratsiho faritr’i Vakinakaratra. Mizaka ny tsy eran’ny ainy amin’ny fifamezivezena sy ny famoaham-bokatra ary ny fitondrana ny marary any amin’ny toeram-pitsaboana ny mponina ao an-toerana...
Mirefy 10 kilometatra eo ho eo ity lalana vaovao hatao ity. Manohana izao ezaka atao izao ny faritra Vakinakaratra, nampindrana ny fitaovana vaventy ampiasaina, saingy anjaran’ny kaominina kosa no miantoka solika ampandehanana izany hoy Ramatoa RAHERIMANDIMBY Solofonirina ben’ny tananan’Antsapanimahazo.
Misitraka tombotsoa amin’ny famakiana lalana vaovao ataon’ny kaominina Antsapanimahazo ny kaominina Ambohiborona, kaominina samy ao amin’ny distrikan’i Faratsiho. Antony nahatonga ny ben’ny tanàna ao Ambohiborona sy ny mponina ao aminy manohana ny ezaka atao amin’izao fanamboaran-dalana izao amin’ny fitondrana ny anjara biriky avy amin’izy ireo.
Azo lazaina ho manana lalana tsara ny ao Ambohiborona noho ny ezaka fanamboaran-dalana saingy mampitondra faisana ny mponina ao aminy kosa ny faharatsian’ny lalana avy eo Antsapanimahazo mihazo ny arabe ao Faratsiho hoy Andriamatoa RAFANOMEZANTSOA Alexandre, ben’ny tanàn’ Ambohiborona. Ny voly vary moa no tena mampahalaza ny kaominina Antsapanimahazo sy Ambohiboroana.
