Loza mitatao ho an'ny fambolem-bary eto Madagasikara ny aretim-bary ateraky ny bakteria ka mila ny fiaraha-mientan'ny mpisehatra rehetra ny ady atao aminy. Miparitaka amin'ny faritra maro eto amin'ny nosy ankehitriny ny aretina malazo ravina na ny BLB sy ny aretina tsipika amin'ny ravina na ny BRS raha toa ka ny volana desambra 2019 no nahitan'ny mpikaroka voalohny azy teto Madagasikara.
Efa ahitàna azy ny any amin'ny Faritra Diana, ny eto Analamanga, ny any Vakinakaratra, Alaotra Mangoro, ny Faritra Androy sy Taolagnaro ary ny any Menabe. Loza mitatao ho an'ny fambolem-bary anaty rano, ny saka maina, ary an-tanety rehefa tena mafy ny aretina. Mety mihoatra ny 70% ny fahaverezam-bokatra ho an'ny aretina malazo ravina ary eo anelanelan'ny 15% hatramin'ny 20% ho an'ny aretina tsipika amin'ny ravina arakaraka ny karazam-bary sy ny toetr'andro.
Aretina avy any ivelany, tany Azia, niditra teto Madagasikara ny malazo ravina na ny BLB. Mbola mamantatra ny toerana ahitana ny aretina ny mpikaroka amin'izao fotoana izao hoy Dokotera Raveloson Harinjaka, mpikaroka ao amin'ny FOFIFA Antsirabe.
