Mbola tsy ampy amin'ny habetsahana sy ny hatsarana ny famokarana vilona ho an'ny omby vavy be ronono eto amintsika. Antony nahatonga ny MDB, nikarakara hetsika "Andron'ny vilona", natao tany Tsiroanomandidy ny 9 jona 2023, ary nitohy teto Analamanga, teny Anosy Avaratra, Distrikan'Antananarivo Avaradrano, ny 16 jona 2023.

Tsy ampy mandavan-taona ny vilona ampiasain'ny mpamokatra, noho ny fisian'ny maitso ahitra. Mbola ny 40%-n'ny filana ihany koa no iantsorohan'ny famokarana vilona eto amintsika. Araka ny fanadihadiana nataon'ny Malagasy Dairy Board na ny MDB, dia tsy ampy 44000 Taonina ny filana raha ho an'ny eto Analamanga sy ny Faritr'Itasy manokana, noho ny tsy fisian'ny fampiasam-bola ataon'ny ny mpiompy.

Manampy trotraka ny tsy fahampian'ny toerana malalaka firaofan'ny omby ahitra, ny fiovaovan'ny toetr'andro, ny firongatry ny doro tanety saika isan-taona. Hetsika nanentanana ny mpiompy, hamboly vilona ho an'ny sakafon'ny ombiny, ny "Andron'ny vilona", mba hividy ny vokatra vilona efa azo ampiasaina, hamokatra sakafon'omby tsara kalitao, ary hifampizara traikefa amin'ny famokarana vilona. Nandray anjara sy nanome voninahitra tamin'ny "Andron'ny vilona" natao teny Anosy Avarata, Antananarivo Avaradrano, ny Minisitra lefitra misahana ny fiompiana, ny Dokotera Raymond.