Voalohan’ny volana jona, andro eran-tany hoan’ny ronono. Mbola ambany ny tahan’ny fanjifan’ny malagasy ny ronono sy ny vokatra azo avy amin’ny, raha mitaha amin’ny mponina atsy Afrika sy any Eraopa. Ronono 16 litatra isan-taona no fanamby apetraka hosotroin’ny malagasy iray raha toa ka 40 litatra isan’olona atsy Afrika ary efa mahatratra 200 litatra isan’olona kosa any Eraopa...

Mametraka lokan’ady hampitombo izay fanjifan’ny malagasy ronono izay sy hanatsara hatrany ny kalitaon’ny vokatra ny ministera mpiahy sy ny Malagasy Dairy Board na ny MDB ary ny mpiara-miombon’antoka aminy. Nivoitra izany androany nandritra ny fanamarihana ny andro eran-tany hoan’ny ronono, mba anentanana ny malagasy anjifa ny ronono sy ny vokatra avy aminy.

Hetsika voalohany nankalazana izany andron’ny ronono izany ny fanentanana ny mpianatra tao amin’ny EPP Ambohimiandra, boriborin-tany faharoa, Antananarivo Renivohitra ny amin’ny voka-tsoa entin’ny ronono sy ny vokatra azo avy aminy amin’ny maha sakafo ara-pahasalamana azy. Mpianatra 360 mahery no nisitraka izany niaraka tamin’ny don-kaopin-dronono tamin’ireo tompon’andraikitra samihafa nanome voninahitra ny lanonana notarihan’ny ministra lefitra misahana ny fiompiana Dokotera Raymond, nanokatra tamin’ny fomba ofisialy ny andro eran-tany hoan’ny ronono hoantsika eto Madagasikara:

Hetsika faharoa nanamarihana ny andro eran-tany hoan’ny ronono androany hoantsika teto Madagasikara ny fanokafana tamin’ny fomba ofisialy ny Foibe Coin Ma-tsiro fanangonana sy fivarotana ronono faha dimy eny Mandroseza ao amin’ny boriborin-tany faharoa Antananarivo Renivohitra.