Manohy ny dingana fampanaraham-penitra an'ireo ivon-toeram-piofanana mivondrona ao aminy ny tambazotran'ny Mpampiofana momba ny Fambolena sy ny eny Ambanivohitra eto Madagasikara na ny FARMADA. Manampy an'ireo ivon-toeram-panofanana, ny mpampiofana, ireo tantsaha mpanao tolo-draharaha momba ny fanofanana ahafahan'izy ireo misitraka ny taratasy manamarina izay fananàny traik'efa izay amin'ny alalan'ny firosoana amin'ny Fankatoavana ny Azo tamin'ny Traik'efa na ny VAE ity rafitra ity ankehitriny.

Iankinan'ny ho avin'ireo Ivon-toerana fanofanana momba ny Fambolena sy ny eny ambanivohitra ny fanatanterahana ny VAE na ilay atao amin'ny teny frantsay hoe : "Validation des Acquis de l'Expérience". Miroso amin'ny dingana fivoizana azy io ankehitriny ny tambazotra FARMADA. Manome lanja ny traik'efan'ny tantsaha mantsy ny FARMADA hoy ny filohany Serge Merison.

Ireo mpikamban'ny FAR eto amin'ny Faritra Analamanga sy ny any Itasy no nisitraka ny fanazavana nataon'ny teknisiana ao amin'ny Ministeran'ny Fampianarana Teknika sy ny Fanofanana Arak'Asa momba ny tsara ho fantatra amin'izay VAE. Atrik'asa natao ny 04 mey 2023 ho an'ny eto Analamanga raha toa ka ny 03 mey kosa ny Faritra Itasy.

Resy lahatra ireo mpisehatra ao amin'ny FAR Analamanga, nanatrika ny fanazavan'ny teknisian'ny Ministeran'ny Fampianarana Teknika sy ny Fanofanana Arak'Asa, fa tena ilaina ny Fankatoavana ny Azo tamin'ny Traik'efa na ny "VAE", na ho an'ny tantsaha izany, na ho an'ireo manana fahalalana manokana momba ny lalam-pihariana ary ny tompon'andraikitry ny ivon-toeram-panofanana.

Hitohy any amin'ny Faritra hafa misy ny tambazotra FARMADA ny fanazavana ny momba ny Fankatoavana ny Azo tamin'ny Traik'efa na ny "VAE" ataon'ny teknisian'ny Ministeran'ny Fampianarana Teknika sy ny Fanofanana Arak'Asa.