Niadian-kevitra ny 04 mey 2023 teo teny amin'ny foiben-toeren'ny Foibe Fikarohana ampiharina amin'ny fampandrosoana ny eny ambanivohitra na ny FOFIFA eny Ampandrianomby ny vokatry ny fandalinana ny momba ny masomboly katsaka, tsaramaso, mangahazo, ary ny ovy amin'ireo Faritra telo nanaovana ny fanadihadiana dia ny teto Analamanga, Itasy ary Vakinakaratra.

Atrik'asa tamin'ny alalan'ny ilay tetik'asa Food Sec Semence, vatsian'ny vondrona Erôpeana sy ny CIRD vola, iarahana miombon'antoka amin'ny vaomieran'ny Ranomasimbe Indiana ary manatanteraka ny asa ho an'ny eto Madagasikara ny FOFIFA. Tetik'asam-paritra anohanana ny  fiantohana ara-tsakafo amin'ireo firenena efatra aty amin'ny  Ranomasimbe Indiana ka isan'izany i Madagasikara.

Kendrena amin'izany tetik'asa izany ny fanaingana ny lalam-piariana masomboly mifanaraka amin'ny vokatry ny fiovan'ny toe-tany sy ny toetr'andro,  mba hisy kalitao ny famokarana sakafo sy ny otrik'aina entina ho an'ireo firenena aty amin'ny Faritra atsimo andrefan'ny Ranomasimbe Indiana ireo. Zava-dehibe ho an'ny famokarana sakafo eto amintsika ny natao androany ho ny tale jeneralin'ny FOFIFA, Profesora Razafinjara Lala.

Isan'ny nivoitra tamin'ny famakafakana momba ireo lalam-pihariana masomboly ireo fa manana olana amin'ny fahazoana masomboly nohatsaraina mahavaly ny filany ny tantsaha eto amintsika. Tsy maharaka ny tinady ny tolotra misy ary tsy  takatry ny fahefa-mividin'ny tantsaha ihany koa. Mikaroka hatrany ny fomba amahana azy ny ministeran'ny fambolena sy ny fiompiana hoyny sekretera jeneraliny Raharinomena Fanja, ary misy ny paik'ady momba izany.