Mamondron-kery miaro ny tontolo iainana sy mitaky ny rariny sy ny  hitsiny amin'ny lafiny rehetra ho an'ny vehivavy tantsaha ireo vehivavy miantsehatra eny ambanivohitra eto Madagasikara na ny FARM "Femme en Action Rurale de Madagascar". Fikambanana mitaky ny zon'ny vehivavy tantsaha amin'ny sehatr'asa ilofosany sy ny fiainany amin'ny maha-olona azy.

Mamaritra ny 43% amin'ny mponina eny ambanivohitra izay mandrafitra ny 80%-ny malagasy ny vehivavy tantsaha. Ny 60% amin'ireo vehivavy tantsaha ireo nefa hoy Ramatoa Ravoniarisoa Hantanirina Lylia, filoha nasionalin'ny FARM dia mamelona samy irery ny ankohonany ny ankamaroany. Tranga heverin'ny FARM fa tsy rariny eny anivon'ny fiaraha-monina, ka mba ahafahana misitraka ny zo no antony ivondronan'izy ireo anaty fikambanana.

Paik'ady efatra no entin'ny FARM manatratra ny tanjona nofaritany. Voalohany ny fanapariahana ny vaovao eny ambanivohitra, ary ny faharoa ny fampiroboroboana ny ara-toekarean'ny mpikambana. Paik'ady fahatelo ny fampiharana ny fambolena miaro ny tontolo iaianana ary ny paik'ady fahaefatra farany ny fanamafisana ny firaisan-kina... 

Manentana sy mampita hafatra ho an'ny rehetra ny amin'ny voka-dratsin'ny fiovaovan'ny toe-tany amin'ny fiainan-janak'olombelona koa ny FARM. Miantso ny olom-pirenena tsy ankanavaka hitandro ny tontolo iainana mba ho tontolo lovain-jafy.