Manao ny fivoriambe fanao isaky ny roa taona ny "Groupement Para Professionnels Vétérinaire de Madagascar" na ny GPPVM, ivondronan'ireo teknisiana niofana manampy an'ireo "vétérinaire" amin'ny fitsaboana sy ny fikarakarana ny biby eny ambanivohitra...
Fivoriana tanterahana eny amin'ny ISTS Mandrimena, Antananarivo-Atsimondrano ny alakamisy 16 sy zoma 17 desambra 2021. Rafitra ahitàna sokajin'asa miisa enina, ka voasolo tena mandritra io fivoriana io, ireo sokajin'asa ireo...
Ankohatra ny fandinihana ny momba ny raharaham-pikambanana dia maro ny zava-dehibe hifanankalozan-kevitra mandritra io roa andro io, hoy Andriamatoa Rasoavelomiandrisoa Donné, sekretera jeneraly.
Folo taona teo ho eo izao no nijoroan'ny GPPVM. Ahitàna ireo olona manana sokajin'asa "para-professionnels vétérinaire" manerana an'i Madagasikara saingy mbola vitsy no mivondrona ao amin'ity rafitra ity. Tsy misy afatsy 268 izy ireo no voasoratra anarana. Maro ny dingana efa nolalovana vao nijoro araka ny lalàna ny fisian'ny rafitra mifehy ny "para professionnels vétérinaire" eto amintsika hoy ny filoha lefitra, Rakotomahandry Jean Marie.
Mitàna anjara toerana lehibe eto amin'ny firenena ny "para professionnels vétérinaire". Izy ireo mantsy no tena mifanosona amin'ny tantsaha amin'ny fitsaboana biby eny ambanivohitra. Maro nefa ireo misandoka ny andraikiny ka izay no antony hamondronana hery anaty rafitra toa izao.
