Nankalazaina ny 27 jona 2021 ny taom-bolafotsin'ny Radio Don Bosco. Onjam-peo naorin'ny salezian'i Don Bosco tamin'ny taona 1996. Teny manentana mandritra ny fankalazana ny hoe : "Firotsahana sy hafaliana : mandehana mampianara ny firenen-drehetra" (Mt 28, 19).
Sorona Masina notarihin'i Mgr Jean Pascal Andriantsoavina, Eveka mpanampy eto amin'ny Arsidiosein'Antananarivo, niaraka tamin'i P. Innocent Bizimana, Lehiben'ny Fikambanana saleziaina eto Madagasikara sy ny Nosy Maurice, ary ireo pretra mpiara-miasa. Nanentana ireo mpikatroka rehetra ao amin'ny Radio Don Bosco mba hiroso amin'ny lalina kokoa omban'ny herim-po i Mgr Jean Pascal nandritra ny toriteny;"Efa maro ny trai-kefa noraisina tao anatin'ny 25 taona, ka afaka ny manao ny tsara kokoa ianareo. Adidinareo ny mampita ny finoana sy manabe ny mpiara-belona", hoy izy nanatitrantitra.
Nanditra ny lahateny nifandimbiasana no nanambaran'i P. Innocent Bizimana fa asan'Andriamanitra ny Radio Don Bosco satria "Raha tsy ny Tompo no manorina ny trano dia miasa foana izay manorina azy ireny" (Sal 127,1). 15 taona taorian'ny fahatongavany teto Madagasikara ny salezianina no nanorina ny onjam-peo mba hampielezana ny feon'Andriamanitra ho an'ny vahoaka malagasy indrindra ho an'ny tanora. Nankahery ireo mpiara-miasa rehetra ao amin'ny Radio Don Bosco izy mba hanatratra ny tanjona dia ny fampivoarana an'i Madagasikara sy ny fanabeazana ny fiaraha-monina. Navoitrany tamin'ny lahateniny fa niainga tamin'ny onjam-peo ihany ny Radio Don Bosco nefa nahay nanaraka ny fiovan'ny toetrandro ka nampiasa ny tambajotra amin'ny satelita mba hampifandraisana ireo radion'ny diosezy rehetra eto Madagasikara. Teo ihany koa ny famoronana ny rindra-kajy ho an'ny finday. Nanosika azy ho any amin'ny ho avy ihany koa ny fivoaran'ny teknolojia ka nikirakirana ny teknolojian'ny tranokala sy ny tambajotra-pifandraisana mba hanamafisana ny fifandraisana amin'ireo mpihaino. Tazoniny hatrany ny maha-izy azy sy ny mampiavaka azy amin'izany.
Tsy ny mpiara-miasa rehetra nandritra izay 25 taona ihany no nankasitrahan'i P. Eric Franck Randriamiandrinirinarivo, Talen'ny Radio Don Bosco, fa teo ihany koa ireo mpihaino mpankafy, izay anto-pisian'ny RDB. Tamin'ny famaranana ny Sorona masina no nanolorany ny amboara ho an'ny Tarika ny Ainga izay nandrindran'ny feon'ny hira faneva amin'izao taon-jobily izao.
