Zoma 3 desambra 2021 — Herinandro voalohany amin'ny Fiavian'ny Tompo — Indro avy ny Tompontsika miaraka amin’ny heriny, ary hohazavainy ny mason’ireo mpanompony — Evanjely Masina nosoratan'i Masindahy Matio 9, 27-31

Manam-pinoana ireto jamba roa lahy ireto fa i Jesoa no afaka mampahiratra azy ireo. Eto moa dia ny famindram-po no nangatahany ary fatantr’i Jesoa fa ny tsy fahitana no mahaory azy ireo. Fatantr’izy ireo koa fa i Jesoa no mahay manasitrana azy ka tsy navelany fa notanarahany hatrany an-trano. Mahavariana ny hoe nifampitantana izy ireo nanaraka an’i Jesoa hatrany an-trano. Na jamba aza dia mahay mifanohana, mifampitarika manaraka an’i Jesoa. Vavaka fifonana no nipololotra avy ao am-pon’izy ireo : "Ry Zanak’i Davida ô, mamindra fo aminay!". Ilay vavaka fifonana ataontsika amin’ny Sorona Masina na amin’ny fotoam-pivavahana ataontsika. Tsy izy roa lahy ihany no jamba ka mila fahiratana, fa na isika koa aza dia jamban’ny fahotana, ka mila mandrakariva ny famindram-pon’Andriamanitra. Tsy manosi-bohotanana izay mitady ny Famindrampony Andriamanitra.

Amin’izao vanim-potoan’ny Fiaviana izao no iandrandrantsika ny famindrampon’Andriamanitra sy ny famonjena ka itodihantsika any Aminy. Manana ny anjara toerany lehibe amin’izany ny vavaka, dia vavaka am-paharetana sy fahatokisana tanteraka an’Andriamnitra. Porofon’izany ny tsy namalian’i Jesoa azy roa lahy teny an-dalana raha tsy tonga tany an-trano. Raha olona mora kivy sy tsy nanam-paharetana izy roa lahy tsy ho tojo amin’izao zavatra niriny izao. Mila fitsapana ny finoana mba ho lalim-paka. Ny finoana voasedra no mitondra vokatra tsara eo amin’ny fiainantsika. Fotoana ilana faharetana izao vanim-potoana diavintsika izao dia tsy inona izany fa ny faharetana mivavaka ary mila koa finoana lalina mba hanova ny fiainantsika any amin’ny tsara kokoa hatrany. Amen !