Alahady 31 oktobra 2021 — Alahady faha iraika amby telopolo mandavantaona — Raha misy tia Ahy, hitandrina ny teniko izy, ka ho tian’ny Raiko; ary hankao aminy izahay, ka honina ao aminy — Evanjely Masina nosoratan'i Masindahy Marka 12, 28b-34

Inona no voalohany amin’ny didy rehetra ? Io no fanontaniana napetrak’ilay mpanora-dalàna tamin’i Jesoa. Ny didim-pitiavana anefa no namalian’i Jesoa azy izay nosokajiany roa.

Ny voalohany dia ny fitiavana an’Andriamanitra amin’ny fo, saina sy fanahy ary ny hery manontolo ; Izy no tokony ho tiana voalohany sy ambonin’ny zavatra rehetra. Ny fitiavany antsika olombelona mantsy dia tsy mba mivadika na oviana na oviana. Ny faharoa dia mitovy amin’izay ihany : ny fitiavana ny namana tahaka ny tena. Ny namana dia ireo olona rehetra tsy an-kanavaka, eny na dia ireo heverintsika fa fahavalo aza. Noho izany, tsy afaka misaraka ny fitiavana an’Andriamanitra sy ny fitiavana ny namana.

I Jesoa dia nahatanteraka izany didim-pitiavana izany tamin’ny alalan’ny Hazofijaliana. Noho ny fitiavany an’ilay Andriamanitra Rainy dia nanaiky ny sitrapony Izy ny hijaly sy ho faty eo ambonin’ny Hazofijaliana. Ary noho ny fitiavany antsika olombelona rehetra ihany koa, dia nafoiny ny ainy teo ambon’io Hazofijaliana io ihany. Sady fatra-pitia an’ Andriamanitra Rainy izay naniraka Azy i Jesoa, no fatra-pitia ny olombelona izay nanirahana Azy ihany koa.

Didim-pitiavana àry araka izany no irin’Andriamanitra hiainantsika ary io koa no antoka hidirantsika any amin’ny fiainana mandrakizay.