Sabotsy 16 oktobra 2021 — Herinandro fahavalo amby roapolo mandavantaona — Mahatoky ny lahatrao, ry Tompo, ary mafy orina mandrakizay alaovalo — Evanjely Masina nosoratan'i Masindahy Lioka 12, 8-12

Mbola manohy ny resaka mahakasika ny fijoroana ho vavolombelon’i Kristy, izay efa noresahana teto omaly ny Evanjely vao novakiana tamintsika teo. Manampy antsika ho vonona tsy amin-tahotra sy tsy amim-pisalasalana ilay fitsarana ho avy ny ezaka atao ho fanatsarana bebe kokoa io fijoroana ho vavolombelon’i Kristy Jesoa io. Tsara homarihana fa mifototra amin’ny fahaiza-mifandray amin’i Kristy izany fitsarana farany izany ka izay tsy niraharaha an’i Kristy na koa nandà ny maha-Tompo sy Andriamanitra azy dia hahatsiaro tena ho irery tanteraka manoloana ny fitsarana ; fa ireo niaro azy na dia tao anatin’ny fanenjehana aza izy dia hahatsapa ny fisiany eo akaikiny mandritra ny fitsarana, satria hiaro sy hisolo vava azy i Kristy ; ary ny Fanahy Masina koa hanoro azy ny teny tokony hotenenina mba tsy hananan’ireo mpanameloka azy halahatra.