Sabotsy 9 oktobra 2021 — Herinandro fahafito amby roapolo mandavantaona — Omeo fahalalana aho, ry Tompo, hitandremako ny lalanao ary hanarahako azy amin’ny foko tontolo — Evanjely Masina nosoratan'i Masindahy Lioka 11, 27-28
Anisan’ny fahasambarana ho an’ny ray aman-dreny ny fananana zanaka hendry sy olom-banona, satria hoe tsy niteraka zana-baratra fa voromanga niteraka voromanga, ary ny hazo no vanon-ko lakana dia ny tany naniriany no tsara. Dia toy izany koa ny fahitan’ity vehivavy iray teo anivon’ny vahoaka izay azo faritana hoe nitsiriritra satria manan-janaka hendry i Masina Maria manana an’i Jesoa. Raha tsorina dia hoe ny fananana zanaka hendry no mitondra fahasambarana ho an’ilay nahitana masoandro. Tsy nandà an’izany i Jesoa satria zava-marina sy zava-misy, fa mainka sambatra aza, hoy i Jesoa, izay mihaino ny tenin’Andriamanitra ka mitandrina azy. Ny fandraisana sy ny fankafizana ny tenin’Andriamanitra dia anisan’ny zava-dehibe hafa ankoatra ny fahaterahana ara-nofo.
Ry havana, raiso ny tenin’Andriamanitra ary ankatoavy, hiaino ka ataovy tonga nofo eo amin'ny fiainana, satria efa natoron’i Kristy androany ny tsiambaratelon’ny fahasambarana, dia ny tenin’Andriamanitra.
Raisiko ny anjara manandrify ny fiantsoanao ahy, vonona aho ity hamin'ny fara-fofon’aiko. Fa izany no voadiko masina ry Andriamanitra Raiko ! Amen.
