Zoma 17 septambra 2021 — Herinandro fahefatra amby roapolo mandavantaona — Izaho no fahazavan’izao tontolo izao, hoy ny Tompo; izay manaraka Ahy no hanana ny fahazavan’ny fiainana — Evanjely Masina nosoratan'i Masindahy Lioka 8, 1-3

Ilaina ny fifaneraserana amin’Andriamanitra, amin'i Jesoa satria ny fiainana ao Aminy no zaraina amin’ny hafa. koa rehefa lasa nitety ny tanàna sy ny vohitra i Jesoa dia nanaraka Azy ireo mpianany roa ambin’ny folo lahy sy ireo vehivavy nositraniny tamin’ny fanahy maloto sy ny aretina. Tonga fanovozana hery sy hafalina ho azy ireo ny fiarahany tamin'i Jesoa. Vaovao Mahafaly no andikana ny Evanjely ary ny momba ny Fanjakan’ny Lanitra no ambara ao. Ho toy ny lalivay eo amin’ny fiainan’ny izay mihaino azy sy miaina azy ny Evanjely, hany ka ny olona mandray azy dia tonga mamy hoditra eo amin’ny fiaraha-monina misy azy. I Jesoa mihitsy no Evanjely na Vaovao Mahafaly ho an’izay mifanerasera Aminy. Ny Apôstôly sy ireto vehivavy sasantsasany ireto nanaraka an'i Jesoa, nihaino ny teniny. Io teniny io no namolavola azy ireo, nanasitrana sy nahafahana nandroaka ny fanahy maloto tamin’ireo vehivavy ireo.

Fa mila ny fanampian’ny hafa koa ny fitoriana ny Vaovao Mahafaly. Nanampy tamin’izany ireto vehivavy ireto tamin’ny alalan’ny fahafoizany ny fananany. Ny olona rehetra no antsoina hifarimbona amin’ny fitoriana ny Vaovao Mahafaly, dia ny Evanjelin’ny Fanjakan’ny Lanitra na amin’ny alalan’ny teny ambara sy zaraina na amin’ny alalan’ny fampitaovana ilaina hanamorana izany asa fitoriana izany. Asan’ny Fiangonana no mitory ny Vaovao Mahafaly mba hanova ny tontolo ho araka ny sitrapon’Andriamanitra sy ho tontolo mahatehonina ; ahafahana koa mamonjy ny olona rehetra na dia amin’ny faritra antsoina hoe lavitr’andriana aza. Hohaintsika anie ny hifaneraseara amin'i Kristy mba ahafahantsika mizara Azy amin’ny hafa. Amen.