Sabotsy 4 septambra 2021 — Herinandro faharoa amby roapolo mandavantaona — Asehoy ahy, ry Tompo ny lalanao, ary tariho amin’ny lala-mahitsy aho — Evanjely Masina nosoratan'i Masindahy Lioka 6, 1-5

Fampadinihana mahakasika ny sabata sy ny fijerena ny maha olona ataon'i Kristy no aroson'i Masindahy Lioka amintsika eto. Na dia eo aza ny lalana, ny maha olona ihany koa tsy azo atao tsinontsinona satria "ny sabata no natao ho an'ny olona fa tsy ny olona no ho an'ny sabata", hoy i Kristy, ao amin'i Masindahy Marka 2, 23-28, ary amafisiny eto hoe : "Izy no tompon'ny sabata". Koa raha tompon'ny sabata àry izy, dia tsy maintsy mandanjalanja izay fomba hampiharana azy. Tsy natao ho andevon'ny sabata ny olona, ho an'i Kristy, fa ny sabata kosa no tokony hitsinjo ny maha olona : "Tsy novakianareo va izay nataon'i Davida raha noana izy mbamin'izay nanaraka azy, fa niditra tao an-tranon'Andriamanitra izy ka naka ny mofo nalahatra, dia nihinana izany sy nanome izay nanaraka azy koa, nefa tsy misy mahazo mihinana azy afa-tsy ny mpisorona ihany".

Toy ny arofanina ny lalana fa tsy geja akory. Manokatra ny fomba fisainan'ny Farisianina i Kristy mba tsy hikombona na hanaraka ambokony fotsiny ny lalana, fa hijery sy handinika kosa ny maha olona. Noho izany, ny lalana dia natao hamelona fa tsy hamono, ary ny sitrak'Andriamanitra dia ny hahavelona ny olona fa tsy hoe ho faty noana. Ka na dia sabata aza ny andro, tsy maintsy tsinjovina izay hahavelona ny aina. Diniho àry, izay voalazan'i Kristy teo mba hampiharina eny amin'ny fiaraha-monina eny. Tsy hoe mampianatra antsika hanohitra be fahatany izay fitsipika misy izy, fa mampandinika kosa izay mba hitsinjovana ny maha olona ary hanao izay hahavelona azy.