Zoma 3 septambra 2021 — Herinandro faharoa amby roapolo mandavantaona — Izaho no Lalana sy Fahamarinana ary Fiainana, hoy ny Tompo, tsy misy olona mankany amin’ny Ray afa-tsy amin’ny alalako — Evanjely Masina nosoratan'i Masindahy Lioka 5, 33-39

Ao amin'ny Testamenta Taloha, ny fifadian-kanina sy fisotro dia famantaram-pahatokisana ny fanajana ny lalana eo am-piandrasana ny Mesia. Efa nohavaozin'i Kristy anefa izany satria Izy mihitsy no Mesia anndrasana, koa tsy tokony hifady hanina intsony. Izy no Mpampakatra ambaran'ny teniny eto, ka ahoana àry no hifadian'ny mpianany hanina ? Mbola ho avy, hoy izy, ny fotoana hanesorana ny Mpampakatra aminy ka amin'izay vao hifady hanina izy ireo. Fiainam-baovao no nentin'i Kristy, ka manafoana ny tranainy izy amin'izany, izany no nanaovany ity fanoharana ambaran'i Masinday Lioka ity. Ny lamba tonta sy ny siny hoditra tonta dia ny fomba rehetra taloha, fa ny lamba vaovao sy ny divay vaovao dia ny Evanjely na izy tenany sy ny fombany mihitsy. Mazava ny valintenin'i Kristy araka izany, efa tonga ny andron'ny Mpamonjy, vanim-potoanan'ny fifaliana ny vanim-potoana miaraka amin'i Kristy, ary tsy misy fiafarany. Ny fifadian-kanina izany ho azy, dia midika ho trangam-piainana hafa mihitsy, izany hoe trangam-piainana tsy iarahana amin'i Kristy intsony. Fiainam-pifaliana miaraka amin'i Kristy ny fiainan'ny mpianany ka tsy avelany hijaly izy ireo ; tsy hoe manome vahana ny mpianany tsy hanaraka ny fomba sy ny lalana misy izy, fa mampandinika kosa mba hahay hijery ny ankehitrininy.

Isika ihany koa àry, no entanin'i Kristy mba tsy ho entim-pahazarana fotsiny fa hahay hanadihady ny trangam-piainana miaraka aminy.