Alakamisy 2 septambra 2021 — Herinandro faharoa amby roapolo mandavantaona — Efa nataoko hoe sakaiza ianareo, hoy ny Tompo; satria efa nambarako taminareo avokoa izay rehetra reko tamin’ny Ray — Evanjely Masina nosoratan'i Masindahy Lioka 5, 1-11

Mahaliana tokoa ny tenin'Andriamanitra satria mankahery sy mitondra famonjena ; tsy mahagaga àry, raha itangoronan'ny vahoaka i Kristy eto, satria te handre sy te hahazo fahasoavana izy ireo na dia eny amoron-drano aza. Tsy nanosi-bohotanana azy ireo i Jesoa, fa nanaiky hampianatra azy ireo, hitondra izay Vaovao Mahafaly izay. Tsapantsika avy amin'ity zava-nitranga ity àry, fa ilaintsika olombelona eo amin'ny fiainantsika ny tenin'Andriamanitra. Profon'izany, ity nolazain'i Simôna Piera ity hoe : "Noho ny teninao, dia halatsako ihany ny haratoko". Tsy manoro vohona i Kristy fa mikendry mandrakariva izay hahasoa antsika amin'ny alalan'ny teniny.

Mila finoana sy fahatokisana azy tanteraka anefa izany, mba tsy ho teny manidina fotsiny na sanatria toy ny rano atondraka volom-borona ka handalo fotsiny, na ahiditra amin'ny sofina havia ka havoaka amin'ny sofina havanana fotsiny. Mihaike tahaka an'i Simôna Piera eto, ka sahia milaza hoe : "Mialà amiko, Tompoko, fa mpanota aho", satria isika indraindray, toa zatra mihaino fotsiny ny teny fa tsy manatanteraka akory. Tsy ataotao foana na fombafomba fotsiny àry itony fandaharana "Tenin'ny Tompo" ato amin'ny Radio Don Bosco itony, fa natao mba hanampy antsika amin'ny fiainana andavanandro, indrindra amin'ny fiainana maha kristianina.

Koa aza matahotra àry, fa mahasoa antsika tokoa ny tenin'Andriamanitra zaraina isan'andro. Sahia manaraka akaiky sy manongilan-tsofina hihaino ny fampianaran'i Kristy, tahaka ireo namoy ny zavatra rehetra ka nanaraka azy.