Sabotsy 26 jona 2021 — Herinandro faharoa ambin'ny folo mandavantaona — Mitenena, Tompo ô, fa mihaino ny mpanomponao : Ianao no manana ny teny mahavelona mandrakizay — Evanjely Masina nosoratan'i Masindahy Matio 8, 5-17
Mankalaza ny fetin’ny fahaleovan-tena isika androany. Mivavaka manokana isika ho an’ity firenentsika ity mba ho Tanindrazana ahitan’Andriamanitra ny finoana velona. Miarahaba manokana koa ny Foloalindahy. Tsy kisendrasendra fa ny Soratra Masina anio dia miteny mikasika ity kapiteny, manam-boninahitra romanina iray ity. Vaky vava i Jesoa nahita ny finoany. Hoy i Jesoa : "Lazaiko aminareo marina tokoa fa tsy mbola nahita finoana lehibe tahaka izany Aho tamin’i Israely". Miaramila romanina, tsy voaray tsara loatra raha teo amin’ny fiara-monina satria mpanjanaka ary tsy hebrio, kanefa nanam-pinoana lehibe. Ho vahoaka Malagasy manam-pinoana tahaka ity manam-boninahitra ity anie isika mianakavy.
Ny faneken’i Jesoa hanasitrana dia mampiseho amintsika fa i Jesoa dia tonga ho an’ny olona rehetra, hanafaka ny rofy isan-karazany. Tsy natao ho an’ny Jody irery izany famonjena izany fa ho an’izao tontolo izao. Tonga ilay zanak’Andriamanitra, hamonjy izao tontolo izao. Dia mbola manamafy izany ny fanasitranany ny rafozambavin’i Masindahy Piera. Tsy nomen’ny fiarah-monina Jody lanja loatra mantsy ny vehivavy, indrindra moa vehivavy efa nahazo taona, efa lehibe. Tonga i Jesoa hamonjy ny rehetra na iza na iza tsy misy fanavahana, na kely na lehibe ; na vehivavy na lehilahy; na Jody na Jentily, izany hoe ny olombelona manontolo.
Tanteraka ilay tenin’i Izaia mpaminany : "Izy naka ny rofintsika, sy nitondra ny aretintsika". Mankalaza ny fetim-pirenena isika, modely ho antsika i Jesoa. Tonga Izy mba hanafaka, hamonjy antsika amin’ny rofy sy ny aretina isan-karazany. Ireo mpiray tanindrazana nitolona nahazoantsika ny fahaleovan-tena dia tena nampiseho izany fahafoizan-tena izany koa. Tsy ataontsika rano raraka an-tany izany fa indrindra moa ilay ran’i Kristy nafoiny ho antsika.
Ry Andriamanitra Andriananahary, mba tahio ity nosinay ity ka omeo fahendrena ny filoha sy ireo mpitondra anay ary ho olom-pirenena vanona sy kristianina mazoto anie ny vahoaka ao aminy.
