Sabotsy 8 mey 2021 — Herinandro fahadimy fankalazana ny Paka — Tsy maintsy hijaly i Kristy sy hitsangan-ko velona; ary hiditra amin’ny voninahiny — Evanjely Masina nosoratan'i Masindahy Joany 15, 18-21

Maneho teny fankaherezana ho an’ireo mpianany i Jesoa ary milaza mialoha mazava ny toe-java-misy hitranga eo amin’ny fiainana amin’ny fanarahan-dia azy. Tsy mora arak’izany ny manara-dia an’Andriamanitra. Sarotra ary tena manahirana, nefa raha tena miaina ny finoana kosa dia tsy tokony hatahotra ary tsy tokony hisalasala satria matoky manana an’i Jesoa mpitarika isika. Izay milaza sy mitonona ny tenany ho mpanara-dia an’i Jesoa dia tsy maintsy manaraka ny lalan-kizorany ary tsy mahazo manao tsobo-dranon-dramiangaly.

Raha ampatsiahivina izany olon’izao tontolo izao izany dia ireny olona miaina fe miaina fotsiny ireny ; tsy mba mpanantona fiangonana ary mihambo ho mahavita tena fa indrindra ireny olona mahafantatra ny fisian’Andriamanitra fa saingy tsy mivaky loha, manao mafy sofina ka manentsi-tadiny. Ireny no manohitra ny fisian’i Jesoa sy ny fanambarany.

Etoana àry dia toy ireo Apôstôly isika, efa natsoin’Andriamanitra teny anivon’ny fiaraha-monina teny. Nantsoiny ho mpiara-miasa aminy tamin’ny Batemy izay noraisintsika. Olona hatokisan’Andriamanitra isika ka hirahiny indray ho eny anivon’izao tontolo izao mba hijoro ho vavolombelony.

Raisiko ny anjara manandrify ny fiantsoanao ahy, vonona aho ity hatramin’ny fara-fofon’aiko ka izany no voadiko masina ry Andriamanitra Raiko ô ! Amen !