Alatsinainy 12 avrily 2021 — Herinaindro faharoa fankalazana ny Paka — Nitsangan-ko velona i Kristy, sady nitondra antsika amin’ny mazava; isika izay navotany tamin’ny Rany — Evanjely Masina nosoratan'i Masindahy Joany 3, 1-8
Fihaonan’i Jesoa tamin’ny Farisiana iray antsoina hoe Nikôdema no tantarain’ny Evanjely eto. Fihaonana ahafantarantsika ny antsoina hoe fahateraham-baovao. Ambaran’i Jesoa aminy fa raha tsy ateraka indray ny olona dia tsy mahazo mahita ny Fanjakan’Andriamanitra. Ny hoe ateraka indray dia midika ho fahateraham-baovao izany hoe ateraky ny lanitra na aterak’Andriamanitra. Mazava loatra fa ny batemy no ahatanterahan’izany. Amin’ny batemy dia ateraka indray amin’ny Rano sy ny Fanahy ny olona.
Fony i Jesoa nolefonin’ny miaramila teo ambony Hazofijaliana dia nisy rano sy ra nivoaka ny lanivoany. Ny rano moa dia ny anaovana batemy, ka mahatonga ho olom-baovao. Koa ateraka ho olom-baovao amin’ny alalan’ny sakramentan’ny batemy ny olona vao afaka miditra ny Fanjakan’ny Lanitra. Izay ateraky ny Fanahy dia fanahy, hoy i Jesoa tamin’ny Evanjely nohenointsika teo, hany ka tonga zanak’Andriamanitra, ary ny zanaka no mandova, koa rehefa vita batemy isika ary mihaino sy mivelona amin’ny Tenin’Andriamanitra dia ho mpandova ny fiainana mandrakizay. Asan’ny Fanahy Masina àry mampamokatra ny Tenin’Andriamanitra ao anatintsika ao, manova ny fontsika ho toy fon-janaka mankatoa ny Ray; tsy hifikitra amin’ny zavatry tany fa hakafy ny zavatry ny lanitra. Ezaka takiana amintsika izany eto amin’ity tany fandalovana ity. Hiezaka hiala sy handositra ny fahotana sy ny ratsy rehetra fa hanaraka an’i Jesoa fahazavana.
Ny alina moa i Nikôdema no nanatona an’i Jesoa ; eo ny fahatahorany ny Jody namany ; fa eo koa ilay famantarana ny hoe tao anatin’ny haizina ny fiainany no miezaka manatona an’i Jesoa Fahazavan’ny fiainana izy. Toraka izany koa ny fiainantsika, mila an’i Jesoa mandrakariva isika hanazava ny fiainantsika, dia i Jesoa efa nandresy ny fahotana sy ny fahafatesana tamin’ny nitsanganany ho velona. Ny fanatonantsika an’i Jesoa no antoky ny famonjena antsika. Amen !
