Sabotsy 11 janoary 2020 — Herinandro manaraka ny Epifania — Evanjely Masina nosoratan'i Masindahy Joany 3, 22-30 — Ny olona nitoetra tao amin'ny haizina dia nahita fahazavana lehibe; ary ireo izay nitoetra tao amin'ny aloky ny fahafatesana no niposahan'ny mazava.
Na dia mpialoha làlana an'i Kristy aza i Joany, nanomana ny vahoaka handray azy dia tsy nihevitra ny tenany mihitsy ho ambony noho i Kristy. Na dia nanao batemy nialoha an'i Kristy aza izy, tsy mba nanohitra an'i Kristy velively. Tsy ny hifaninana amin'nizay maha-izy an'i Kristy no nahatongavan'i Joany nialoha làlana azy, fa ny fanetren-tena, ny fahamarinana, ny fahatsorana no nentiny nanondro an'i Kristy sy nanomana ny fahatongavany. Tsy i Kristy aho hoy izy, fa nirahana hialoha azy, Izy tsy maintsy mitombo fa izaho kosa tsy maintsy mihena.
Hatsaram-panahy tsara ampiharina tokoa no asehon'i Joany antsika, manoloana ny fahombiazan'ireo izay heverina ho mpifaninana aminao eny anivon'ny fiaraha-monina eny fa tsy sanatria akory fialonana na fanenjehana no asetry azy. Tsy nisy fifaninana ny fifanenjehana velively teo amin'i Joany Batista sy i Jesoa na dia samy nanao batemy aza. Toetra azo alain-tahaka tokoa izany ho an'izay rehetra mitory ny Vaovao Mahafaly, fa tsy sanatria akory hifanohitra na hifanenjika manoloana ny fahombiazan'ny sasany: Vaovao Mahafaly no toriana fa tsy sanatria vaovao mampalahelo.
Koa raiso ary ianaro izay toetran'i Masindahy Joany Batista izay, nanomana an'i Kristy hitondra fahazavana Vaovao Mahafaly ho an'izao tontolo izao.
