Zoma 10 janoary 2020 — Herinandro manaraka ny Epifania — Evanjely Masina nosoratan'i Masindahy Lioka 5, 12-16 — Nitory ny Evanjelin'ny Fanjakan'Andriamanitra i Jesoa, ary nanasitrana ny aretina sy ny rofy rehetra tamin'ny olona.
"Mety aho, madiova ianao", famantarana ny hatsaram-pon'Andriamanitra ny naneken'i Kristy hanasitrana ity lehilahy azon'ny habokana ity. Ny habokana mantsy teo amin'ny Jody, voalaza an'ny amin'ny boky Deterônômy 28, 27-33 dia isan'ny artein-dratsy vokatry ny fahotana. Aretina tsy azo hifapikasokasohana amin'ny namana, indrindra eny anivon'ny fiaraha-monina eny dia tsy maintsy miavaka amin'ny besinimaro. I Kristy anefa dia fantatr'ity lehilahy ity fa afaka mamerina azy indray ao anatin'izany fiaraha-monina izany noho ny finoany. Niankohoka sy nitaraina mafy taminy izy hanambarany hamafin'ny fijaliany noho io aretina mahazo azy io.
Antra sy mangoraka i Krsity ka nihoarany izany fady mangeja ny fiaraha-monina mametra ny isam-batan'olona tsy hifampikasoka, tsy hifandray izany, indrindra manavakavaka ity lehilahy marary ity. Nahinjiny ny tànany nanendry azy, sitrana ralehilahy. Sitrapon'Andriamanitra no nahatonga izany fahasitranana izany. Ny fitiavan'i Kristy no namonjena azy.
Ny hamonjy sy hanavotra ny olombelona tokoa no nahatongavan'i Kristy tety an-tany sy teo anivontsika. Indrindra moa fa manoloana ny fahotana izay mahazo antsika, ka rariny sy hitsiny raha mamaly ny fangatahan'ity lehilahy ity izy. Ary ho porofon'ny fahasitranany no nanirahana azy hiseho amin'ny mpisorona mba hidirany indray eo anivon'ny fiaraha-monina.
Tsapantsika amin'ity trangam-piainana ambaran'i Masindahy Lioka amin'ny Vaovao Mahafaly ity àry fa mamindra fo mandrakariva Andriamanitra ary ny hahasambatra antsika no kendreny. Mety maro ny karazana habokana miseho ao anatintsika ao, eny anivon'ny fiainana andavanandro eny, koa meteza mba ho sitranin'i Kristy, ary maneke hanaraka azy hanatona sy handray izay famindram-pony izay.
