Talata 9 marsa 2021 — Herinandro fahatelo amin'ny Karemy — Tsy ny hahafatesan’ny ratsy fanahy no sitrako, fa ny hialan’ny ratsy fanahy amin’ny lalany ka ho velona izy — Evanjely Masina nosoratan'i Masindahy Matio 18, 21-35
Ny Evanjely nohenointsika teo dia mampiantra antsika fa ny famindram-po dia tsy misy fetra. Mora fo sady mpamindra fo Andriamanitra. Ho an’izay mahalala ny famindram-pon’Andriamanitra dia mahazo ny lazain’i Jesoa fa tsy misy lalana mitondra mankamin’ny fahasambarana raha tsy amin’ny fanahafana azy : "aoka ho mpamindra fo tahaka ny rainareo mpamindra fo ianareo". Ny hatsarapon’Andriamanitra Ray dia tsy voafetran’ny hadisoana vitantsika, fa ny fanahy torotoro sy ny fanahy manetry tena no sitrak’Andriamanitra sy andrasany amintsika. Koa hampianarin’i Jesoa antsika androany fa tokony hamela heloka mandrakariva isika. Hoy Piera : "Tompoko, raha diso impiry amiko moa ny rahalahiko no tokony hamela azy aho ? Hatramin’ny impito va ? Izaho tsy milaza aminao hoe hatramin’ny impito, fa hatramin’ny impitopolo fito".
Ny fampianarana nampitain’ireto antsoina hoe Rabòny na Rabia, tamin’ny andron’i Jesoa, dia voafetra famindra-po, tokony hamindra fo hatramin’ny fanintelony ihany. Fa ny fampianarana vaovao nentin’i Jesoa ho antsika kosa dia tsy misy fetra famindram-po. Tsy impito fa impitopolo fito, hoy i Jesoa. Tsy azo isaina ny famelan-keloka ho an’i Jesoa.
Ny famindrapo, ny famelan-keloka dia fahasoavan’Andriamanitra, ka tsy misy tambiny, tsy misy fepetra fa maimaim-poana, ka natao ho an’izay miaiky heloka sy izay mitaraina aminy. Ny toetran’Andriamanitra dia tahaka ilay mpanjaka nanana trosa tamin’ny mpanompony, izay ohatra nomen’i Jesoa antsika tao amin’ny Evanjely teo, fa noho izy nitaraina dia navelan’ny Mpanjaka handeha izy sady nafoiny ny trosany rehetra, namindrany fo ity mpanompo ity. Koa hasain’i Jesoa àry isika, hiaina sy hampihatra izany famindrapon’Andriamanitra izany.
Mangataha àry, ny fahasoavan’Andriamanitra amin’izao karemy izao, mba hahay mamela ny hafa amin’ny fo feno fitiavana tokoa isika, satria hoy i Jesoa "Raha tsy samy mamela ny rahalahinareo ianareo, dia tsy havelan’ny Rainareo koa".
