Alarobia 3 marsa 2021 — Herinandro faharoa amin'ny Karemy — Ny Teninao, ry Tompo, dia fanahy sy fiainana ; Ianao no manana ny teny mahavelona mandrakizay — Evanjely Masina nosoratan'i Masindahy Matio 20, 17-28

Manampy antsika handalina ny maha-mpianatr’i Kristy antsika ny Karemy. Ny toetra mampiavaka voalohany ny mpianatra dia ny fahavononany handalo ny zava-mitranga amin’ny fiainan’ilay olona nanapahany hevitra fa harahina dia i Jesoa Kristy izay tsy maintsy hijaly sy ho faty. Io no làlana ahafahan’i Jesoa Kristy hanatanteraka ny sitrapon’Andriamanitra Rainy. Natao haka tahaka Azy isika ary tsy ho gaga raha ho tonga tokoa izany (fanaratsiana, fanarabiana, fanamelohana amin’ny tsy ara-drariny, fampijaliana izay mety hiafara amin’ny fahafatesana koa aza izany) fa izany no hahafahantsika hiara-mandresy aminy amin’ny andron’ny Paka. Ny mpaminany Jeremia kosa no manoro antsika hoe ahoana no hiatrehana ireo karazam-pampijaliana ireo rahefa tonga ? Mila manankina ny fiainana amin’Andriamanitra amin’alalan’ny vavaka feno fitokiana aminy.

An’isany mampiavaka ny mpianatr’i Kristy ihany koa ny toe-tsaim-panompoana. Natao hanompo ny hafa isika fa indrindra ireo madinika. Midika izany, mila mahatsapa isika fa ny fahefana dia fanompoana. Endrika manokana fanehoana ny fanetren-tena izany. Indrisy anefa fa tsy tsapan’iretsy apôstôly, ireo nanara-dia akaiky an’i Jesoa Kristy, araka ny Evanjely androany izany lojika izany satria nihazakazaka tamin’ny toerana manokana eo akaikin’i Jesoa izy ireo, izany hoe nihazakazaka tamin’ny hiady toerana sy voninahitra ka tsy niraharaha akory izay lazain’i Jesoa tamin’izy ireo tamin’io fotoana io hoe : "Tsy maintsy ho faty ny zanak’olona ho famonjena", izany hoe ho tanteraka tsy ho ela ilay nambaran’i Izaia Mpaminany mahakasika an’ilay "Mpanompon’Andriamanitra tsy maintsy hijaly" mba ho famojena an’izao tontolo izao.