Sabotsy 27 febroary 2021 — Herinandro voalohany amin'ny Karemy — Ario lavitra anareo ny fahadisoana rehetra nataonareo, hoy ny Tompo, ary manaova fo vaovao sy saina vaovao — Evanjely Masina nosoratan'i Masindahy Matio 5, 43-48
Taomin’i Jesoa isika ho amin’ny fahamasinana na ny fahalavorariana, ka hoy Izy hoe : “Aoka ho lavorary ianareo tahaka ny fahalavorarian’ny Rainareo izay any an-danitra”. Raha nahary izao rehetra izao Andriamanitra tany am-piandohana dia hitany fa tsara izay rehetra nataony, ka izany fahatsarana izany no mitondra tsikelikely amin’ity fahalavorariana ity ; izany hoe ny hiverenantsika hatramin’ny nahariana antsika tany am-boalohany. Noho izany, izay atao rehetra dia tokony hikatsahana io fahalavorariana io. Ialàna izay tsy mety ary hatsaraina izay efa hita fa tsara mba ho amin’ny tsaratsara kokoa mandrakariva ; izany hoe mandavorary ny asa atao rehetra. Eto izao efa voalaza ao amin’ny Testamenta Taloha ny hoe : “Ho tia ny namanao ianao ary hankahala ny fahavalonao” Fa nataon’i Jesoa ho lavorary kokoa izany ka lasa hoe : “Fa Izaho kosa milaza aminareo : Tiavo ny fahavalonareo, manaova soa amin’izay mankahala anareo, ary mivavaha ho an’izay manenjika sy manendrikendrika anareo ; mba ho zanaky ny Rainareo izay any an-danitra ianareo”. Tsy namafa izay voasoratra Izy fa nanatsara azy ho amin’ny lavorary sy mendrika kokoa. Tsy mora anefa izany fa mila finiavana sy fitiavana ka ezahana tanterahina hatrany. Fa azo isorohana izany ny hoe : aza mitsangan-ko fahavalo, mamorona fahavalo amin’ny fiainana fa ny fihavanana sy ny fifankatiavana no hampanjakaina, amin’izay manjary lanitra ny tany. Izao anefa, ny ratsy tsy kely lalana fa mitady ny handaboka antsika mandrakariva izy, ka mitandrema.
Manaraka izany, isan’ny toetran’Andriamanitra ambaran’i Jesoa amintsika eto ny tsy manavaka : fa na ratsy na tsara omeny masoandro foana, omeny ranonorana na ny marina na tsy marina. Isika anefa maika hanavaka, hanilika ka mizahozaho, mieboebo ; ka izay tsy mitovy firehena, volon-koditra, firazanana, antoko na fikambanana na iray tampo aza ka mahavita tsara sy lasa ambony noho ny tena dia mitady hevitra hamingampinganana azy ireny, foanana anaty lisitra, tsy omena avara-patana. Tsapa amin’izany fa tena manalavitra ny toetran’Andriamanitra mihitsy. Tsy manaha-dRay isika amin’izany fa miova lasy mihitsy ka mila miverina ilalana, mibebaka. Isan’ny takiana amintsika izany amin’izao karemy izao. Ny resaka politika no misy mpomba na mpanohitra ny fitondrana fa isika kosa samy zanak’Andriamanitra ka iray ihany eo anatrehany. Ny rantsam-batana no misy karazany maro amin’ny tena kanefa miombona ho iray ihany mandrafitra ny vatana manontolo ; ka aoka isika tsy hifanavakavaka izany fa toetra mamohehitra sy tsy sahaza ny maha zanak’Andriamanitra antsika izany. Ny kisoa no mifanondro molotra fa isika kosa mifanohintohina sy mifanohatohana hatrany, mikatsaka ny fahamasinana, iantsoana antsika. Koa alao hery dieny izao, hiandrandrana ny Paka ho avy, hisantarana ny Paka mandrakizay iombonantsika indray andro any. Amen.
