Alatsinainy 1 febroary 2021 — Herinandro fahefatra mandavantaona — Aza mba hamafisina ny fonareo anio, fa henoy ny feon’ny Tompo — Evanjely Masina nosoratan'i Masindahy Marka 5, 1-20

Ry kristianina havana, fanasitranana lehilahy azon'ny demony no tantarain'ny Evanjely anio. Ity zava-nitranga ity koa no voalohany nataon'i Jesoa sy nihaonany tamin'ny tsy jody, araka ny Evanjelin'i Masindahy Marka. Tsy mpino sy mpanota, dia olona marary ireo, maloto, any amin'ny fonenan'ny maty. Ny filazana izay rehetra nanjo ity azon'ny demony, dia mahatonga saina hoe mihoatra ny herin'ny olombelona ny fanahy ratsy. Fanampin'izany, manampatra ny heriny ny demony, manao tambabe. Ny hoe lejiona mantsy dia filazana antoko miaramila mpiady, ivondronana vata-miaramila enina arivo eo hoe eo, araka ny lovan-tsofina tamin'ny andron'ny romana.

Nibaboka ny fahareseny anefa ny demony, rehefa tonga i Jesoa. Hany sisa heviny dia nitalaho tamin'i Jesoa mba ho any amin'ny kisoa : biby maloto araka ny Testamenta Taloha. Neken'i Jesoa ny handehan'ny demony ho any amin'ny kisoa, satria te hampiseho Izy fa ambony lavitra noho izay heverina ho harena ny maha olona, indrindra fa ny maha zanak'Andriamanitra. Nohafahan'i Jesoa tamin'izay mety ho namatoran'i Satana azy, ilay lehilahy : izay no asan'i Jesoa, mangoraka ny fahorian'ny olombelona Izy, manafaka, mamerina amin'ny laoniny ilay maha endrik'Andriamanitra nosimban'ny fahotana. Resy tanteraka ny demony, miorina tsikelikely kosa ny fanjakan'Andriamanitra.

Ho iray fijery amin'i Jesoa anie isika, hiray asa aminy satria nohafahana mba hanafaka, novonjena mba hamonjy, ary nampianarina mba hitory. Amen.