Sabotsy 23 janoary 2021 — Herinandro faharoa mandavantaona — Omeo fahalalana aho, ry Tompo, hitandremako ny lalànao, ary hanarahako azy amin’ny foko tontolo — Evanjely Masina nosoratan'i Masindahy Marka 3, 20-21

Tao anatin'ireo fotoana voalohany, nisehoan'i Kristy ampahibemaso, izany hoe, teo amin'ny fahatelopo taonany teo, araka ny maha olombelona Azy, dia efa hita sy tsapa ny nigagan'ireo olon-tsotra Azy, ary maro mihitsy ireo vahoaka nivory sy nanatona Azy, marihin'i Masindahy Marka eto izany. Izany no manaporofo fa tsy anisan'ireny olona miolonolona samirery ireny i Kristy, fa ny vahoaka no ifandraisany, ary izany mihitsy no iraka nanirahana Azy. Nanao ny ainy tsy ho zavatra tokoa Izy, nanatanteraka ny asany ary dia nanadino ny tenany mihitsy aza, ka na ny sakafo ilain'ny vatana aza dia tsy nasiany fotoana kely akory. Nilomano tao anatin'ny maha misionera azy Izy, ary tsy mahagaga raha nolazain'ireo havany hoe : "Efa very saina", satria nifanohitra tamin'ny fiainany telopolo taona lasa ny zavatra nitranga tao anatin'ny telo taona nanatanterahany ny sitrapon'Andriamanitra. Teo aloha, nangina ; nefa tao anatin'ny telo taona, niseho ankarihary, nitory teny tamin'ny vahoaka. Tsy nisy na dia tahotra kely akory aza, nanoloana ny fikasan'ireo Farisianina sy ny Herodiana hanenjika azy. Fakan-tahaka ho an'ireo iraka ankehitriny izany : ny toetran'i Kristy manao vaindohan-draharaha ny asa nanirahana azy, tsy matahotra na inona na inona, mba hiseho tsara izay asa ampanaovina azy izay, ary hahay handanjalanja ny zavatra mitranga, indrindra indrindra hahay hijery izay laharam-pahamehana eo amin'ny fiainana, ka tsy haninona na dia lazain'ny havana aza fa very saina.