Talata 07 janoary 2020 — Herinandro manaraka ny Epifania — Evanjely Masina nosoratan'i Masindahy Marka 6, 34-44 — Nitory ny Evanjelin'ny Fanjakan'Andriamanitra i Jesoa ary nanasaitrana ny aretina sy ny rofy rehetra tamin'ny olona.
Mbola mitohy ihany ny famantarana izay maneho ny maha-izy an'i Kristy. I Masindahy Marka no mitantara amintsika: antra sy mangoraka ny vahoaka Andriamanitra. Be fitiavana ka mamonjy sy manavotra amin'ny hanoanana any an'efitra. Fon'olombelona ny fon'i Kristy fa tsy fo vato akory. Eny fon'Andriamanitra mihitsy aza, misento amin'ny fahoriana mahazo ny hafa.
Nahita ireto vahoaka betsaka nanaraka azy Izy dia nangoraka satria "tahaka ny ondry tsy misy mpiandry" izy ireo hoy i Masindahy Marka. Nandidy ny mpianany i Jesoa mba hanome hanina ny vahoaka, satria ny tany efitra sady ny andro koa efa hariva. Midika izany fa tsy mamela ny vahoaka hiaina ao anatin'ny sarotra i Kristy. Izy no manao dingana voalohany mba hiadanan'ny olony, hamonjy ny vahoakany, ary nasehony tamin'ny fampitomboana ny mofo dimy sy hazandrano roa izany. Tsy "magie" na angano no asehon'i Kristy eto fa ny tena maha-izy azy mihitsy: antra sy mangoraka, mpamonjy sy mpanavotra, tsy mamela ny vahoakany hijaly sy ho tra-pahoriana.
Tsy ny ara-panahy ihany no hanehoan'i Kristy ny maha-izy azy fa hatramin'ny ara-batana ihany koa. Midika izany fa ny maha-olona manontolo mihitsy no vonjen'i Kristy, manam-pahefana ny amin'izany izy noho ny maha-iraka azy. Tsy ataony ambanin-javatra mihitsy ny famonjena antsika olombelona, koa meteza handray izany fitiavany lavorary izany.
