Alatsinainy 24 aogositra 2020 — Masindahy Bartélémy, Apôstôly — Evanjely Masina nosoratan'i Masindahy Joany 1, 45-51 — Raby ô, Ianao no Zanak'Andriamanitra, Ianao no Mpanjakan'i Israely.

Md Bartélémy Apôstôly no ankalazaintsika amin’ity andro ity. Teny Arameana no niavian’ny hoe Bartélémy, midika hoe zanak’i Talmay. Fa nantsoina ihany koa izy hoe Nathanaël, izay azo adika hoe Nomenjanahary.

Fa ity Evanjely aroso antsika ity dia misintona antsika handinika lalina ny fifandraisantsika amin’i Jesoa. Ny fihetsik’i Natanaely tsy nihanona fotsiny tamin’ny fanambarana hoe : “Efa hitanay ilay namabaran’i Moizy sy ny Mpaminany”, fa niroso lalina hatramin’ny fahitana sy fiaraha-miaina tamin’i Jesoa. Tsy hoe tsy ilaina ny fijoroana vavolombelona ataon’ny hafa, na ny fitoriana ataony, tena manan-danja aza. Fa tena zava-dehibe mihoatra lavitra noho izany ny ezaka mba hanana fifandraisana am-po sady lalina miaraka amin’i Jesoa.

Faniriana te hahafantatra, sady manambara ny ao am-po tokoa ny hoe : “Moa mba misy zava-tsoa avy any Nazareta ?” ; fa ny fihaonany mivantana tamin’i Jesoa dia niteraka finoana lalina ho azy ka nanambarany hoe : “Raby ô, Ianao no zanak’Andriamanitra”. Ary niteraka hafaliana sy hasambarana. Ny filazan’i Jesoa azy ho Israelita tsy misy fitaka dia manamafy ny lazain’ny Salamo hoe : “Sambatra ny olona… izay tsy misy fitaka ny fanahiny”. (Salamo 32, 2).

Aza atao ambanin-javatra ny fifandraisana amin’i Jesoa. Aza mihanona amin’ny teny lazain’olona fotsiny fa katsaho sy irio mafy ny hanana fiombonam-piainana aminy.