Alakamisy 16 jolay 2020 — Herinandro faha-15 mandavantaona — Evanjely Masina nosoratan'i Masindahy Matio 11, 28-30 — Raiso amim-pahalemem-panahy ny teny voafafy aminareo, izay mahavonjy ny fanahinareo.

Dia mbola mitohy ihany anio ny fandrenesantsika ny tohin'ny Vaovao Mahafaly omaly, izay ahitana an'i Kristy mihevitra mandrakariva ireo mijaly sy vesaram-pahoriana, izay marihina fa omeny toerana voalohany tokoa ao am-pony sy amin'ny adidy izay ataony. Miantso azy ireo Izy hanatona Azy mba hohamaivaniny amin'izany manjo azy ireo izany ; antsoiny ihany koa hianatra ny halemem-panahy sy ny fanetren-tena tahaka Azy, ary indrindra sahy hitondra ny hazofijaliana miaraka aminy.

Tambitamby no omen'i Kristy ireo mahantra sy madinika ary manetry tena fa tsy mba teny maharary tahaka ny nomeny ireo mpiavonavona sy miseho ho ambony noho ny hafa. Midika izany, fa Izy mihitsy no manaiky haka ny toerantsika raha manatona Azy isika. Marina sy azo antoka fa mahatsiaro ho maivana tokoa isika raha miara-mitondra ireny sedram-piainana mihatra amintsika olombelona ireny amin'Izy Andriamanitra, koa henoy àry ny antson'i Kristy, ary maneke Azy mba hahita fiadanana ho an'ny fanahintsika isika.