1 marsa 2025 — Sabotsy, Herinandro Tsotra fahafito Mandavantaona — Misaotra Anao Aho, ry Raiko Tompon’ny lanitra sy ny tany, fa nambaranao tamin’ny madinika ny tsiambaratelon’ny Fanjakanao — Evanjely Masina nosoratan’i Masindahy Marka (Mk. 10, 13-16)

Tian’Andriamanitra hanatona azy ny olombelona rehetra na inona na inona firazanany, na inona inona fomba amam-panao sy toetrany. Toy izany koa ny sokajin-taona rehetra fa anjarantsika izay efa manana andram-piainana amin’ny fiarahana amin’Andriamanitra kosa no manamora ny fifandraisana amin’Andriamanitra no sady manotrona azy ireny hanatona Azy Tompo.

Tsy mba toy izay anefa no nataon’ireto apostoly fa nosakanany ny ankizy tsy hanatoana an’i Jesoa. Avy amin’ny alalan’io zava-mitranga io ihany koa no nanomezan’i Jesoa lesona azy ireo. Fa afaka alain-tahaka ihany koa ny toetran’ireo ankizy raha te-hiditra amin’ny fanjakan’Andriamanitra isika. Ahitana fahatsorana mantsy ny toetran’ireo ankizy, tsy mitazona alahelo na lolom-po fa mora misinda, toetra matoky tanteraka ny ray aman-dreniny, ary ny faniriany hitombo amin’ny lafiny rehetra fa tsy te ho zaza mandrakariva. Noho izany, sady asain’i Jesoa isika hanamora ny hihaon’ireo zaza madinika amin’Andriamanitra no maka tahaka ireo toetra mahabitika ananany ihany koa.