23 febroary 2025 — Alahady Tsotra fahafito Mandavantaona — Misaotra Anao aho, Raiko, Tompon’ny lanitra sy ny tany, fa nambaranao tamin’ny madinika ny tsiambaratelon’ny fanjakanao — Evanjely Masina nosoratan’i Masindahy Lioka (Lk. 6, 27-38)
Betsaka ireo toetra tian’i Jesoa Kristy iainatsika kristianina voarakitra ato anatin’ity Evanjely ity, fa zavatra anankiray no misarika ny saina eto, dia ny fanasany antsika hanao dingana lalindalina kokoa eo amin’ny sehatra ny fitiavana, izany hoe mila mikatsaka ny kalitaon’ny fitiavana isika. Mampiakatra ny kalitaon’ny fitiavana, hoy i Jesoa ny fanehoam-pitiavana ireo mankahala antsika, ny mivavaka ho azy ireo ary ny tsy hihevitra ny hamaly faty azy ireo.
Mampiakatra ny kalitaon’ny fitiavana kristianina ihany koa ny fahafoizan-tena na zavatra na ny fotoana ho an’ny hafa, indrindra ireo ao anatin’ny tokantranonao, ny ankohonam-piainana misy anao sy ireo mpiara-mianatra na mpiara-miasa; mampiakatra ny kalitaon’ny fitiavana ny fikatsahana ny soa ho an’ny hafa, na iza na iza izy tahaka ny ikatsahako soa ho an’ny tenako ihany koa.
