Alakamisy 23 aprily 2020 — Herinandro faharoa amin'ny Paka — Evanjely Masina nosoratan'i Masindahy Joany 3, 31-36 — Nitsangan-ko velona i Kristy Ilay nahary ny zavatra rehetra ary niantra ny zanak'olombelona.

Tsy hoe : "misora-tena toa voatango" akory i Jesoa eto milaza ny tenany : ho "ambonin’ny olona rehetra sy manambara ny tenin’Andriamanitra" fa manambara ankarihary ny nanirahan’ny Ray Azy. Izy tokoa mantsy no Mpanalalana ny mistery momba an’Andriamanitra sy ny fiainana ao Aminy mba ahazoan’ny olona rehetra miditra ao amin’ny tontolon’Andriamanitra.

Tsy misaraka amin’ny finoana io fiainana mandrakizay ao amin’Andriamanitra io, dia ny finoana an’ilay NIRAHINY, hany irery afaka mizara sy mitondra ny olona rehetra any amin’ny fiainana mandrakizay sy mandositra ny hatezeran’Andriamanitra na ny fanamelohana mandrakizay.

Ezaka mihavao sy mitombo hatrany ny finoana, ary toe-piainana miombona tanteraka amin’i Kristy, ka tsy maintsy velomina sy iainana raha tena mikatsaka ny fiainana ao amin’Andriamanitra isika. Fotoana indrindra izao hanavaozana ny fiainana ara-panahy. Koa angataho Andriamanitra hanome antsika hatrany ny Fanahiny hitondra antsika amin’ny tena fiainana marina.