Talata 21 aprily 2020 — Herinandro faharoa amin'ny Paka — Evanjely Masina nosoratan'i Masindahy Joany 3, 7-15 — Raha niara-nitsangana tamin'i Kristy ianareo, dia ny zavatra any ambony amin"izay itoeran'i Kristy eo ankavanan'Andriamanitra no katsaho.

Ity Evanjely nambara tamintsika teo ity no maneho ny toerana misy an’i Jesoa vokatry ny fitsanganany ho velona : Zanak’Andriamanitra tonga olombelona ary Mpanalalana antsika olombelona amin’Andriamanitra. Izy tao amin’Andriamanitra, niombom-piainana tanteraka tamin’ny Ray ary mahalala ny zavatry ny lanitra no afaka hampafantatra izany amin’izay mino Azy ; Izy irery ihany koa no afaka hitondra ny olona rehetra ao amin’Andriamanitra.

Ny hazofijaliana no fahatanterahan’ny Iraka nanirahan’ny Ray an’i Kristy teto an-tany. Izy nasandratra teo ambony hazofijaliana no mampiharihary ny fitiavan’Andriamanitra an’izao tontolo izao. Izy maty teo amin’ny hazofijaliana no nampita tamintsika olombelona ny ain’Andriamanitra, dia ny fiainana mandrakizay ho an’izay mino Azy.

Enga anie isika mba hiorina mafy ao amin’i Kristy, hino sy hankato ny teniny ary hanao izay hahatanteraka ny fampianarany isan’andro fa IZY IRERY ihany no LALANA TOKANA mankany amin’ny Ray. Jesoa tafatsangan-ko velona ô, aza avela hivily amin’ny lalanao izahay ary ataovy matoky ny herinao, dia ho tonga any amin’ny fonenanao masina izahay rehetra mino Anao.