24 desambra 2024 — Herinandro mialoha ny Noely — Ry ilay Mpanjakan’ny firenena rehetra, avia ary vonjeo ny olona izay noforoninao tamin’ny vovotany — Evanjely Masina nosoratan’i Masindahy Lioka 1, 67-79
Tononkira nataon’i Zakaria ho fiderana sy ho fisaorana an’Andriamanitra, tamin’ny zava-dehibe nataony taminy ity rentsika teo ity, havaloanandro tao aorian’ny fahaterahan’i Joany Batista. Nambara tamintsika omaly, fa fahaterahana mihoatra ny fahefana sy ny lahatra amin’ny lalam-piainantsika olombelona ny fahaterahan’i Joany Batista, efa zokiolona ireo ray aman-dreniny fa kosa nino, sy natoky an’Andriamanitra ka nomeny taranaka. Novonjen’Andriamanitra izy ireo fa nafahany tamin’ny tondromolotra sy ny esoeso, nomeny taranaka, ary nataony mpiara-miasa Aminy amin’ny famonjena ny olombelona rehetra. Fahaiza-mankasitraka sy fanomezan-danja an’Andriamanitra no votoatin’ny tononkira nataon’i Zakaria teo. Fianarana ho antsika mankalaza izao Noely 2024 izao. Misaotra fa nahazo Mpamonjy. Ny fandehanana any am-piangonana hankalaza sy hidera an’Andriamanitra no fomba voalohany hanehontsika izany. Aza adinoina fa ny sasa-kalina, ahaterahan’ny Mpamonjy, no fanombohan’ny Noely ankalazaintsika isan-taona. Misterin’ny fahatongavana ho nofo fa mistery hanavotan’Andriamanitra ny nofo rehetra koa.
Lafiny faharoa momba ny Evanjely rentsika teo, ny famitinana ny tantaram-pamonjena antsika olombelona, izay tanteraka ao amin’i Jesoa Kristy, ilay taranaky i Davida ara-nofo. Ilay Andriamanitra tonga mamangy ny olony. Zava-tsoa lehibe tsy tambo isaina no entin’ny Noely antsika, efa ambaran’i Zakaria tamin’ny tononkira nataony rentsika teo dia:
- Ny maha eo anivontsika an’Andriamanitra katsahantsika sy mampangetaheta ny olombelona hatrizay.
- Ny fanavotana antsika amin’ireo fahavalo sy mpankahala.
- Ny indrafo asehony antsika amin’ny alalan’io Zanany tonga miara-monina amintsika io.
- Ny fitarihany antsika hiala ao anatin’ny haizina ho amin’ny mazava, hahitantsika ny fiadanana marina.
Isika olombelona, nofo sy rà, miaritra sy miaina ao anatin’ny zava-tsarotra sy manahirana, eny hatramin’ny fahafatesana aza, no ahatongavan’ny Zanak’Andriamanitra; meteza hanomboka fiainana vaovao miaraka Aminy mba ho feno fiadanana ny fontsika mandray Azy, ho feno fiadanana isika rehetra miara-monina Aminy. Mirary soa ho antsika rehetra sahady amin’izao Noely 2024 izao.
