28 septambra 2024 — Sabotsy, Herinandro Tsotra fahadimy amby roapolo Mandavantaona — Omeo fahalalana aho, ry Tompo, hitandremako ny lalànao ary hanarahako azy amin’ny foko tontolo — Evanjely Masina nosoratan’i Masindahy Lioka (Lk. 9, 44b-45)

Mety an’isan’ireo kristianina tsy mahazo ny tian’i Jesoa Kristy lazaina sy matahotra ny mametra-panontaniana ireo votoan’ny finoana kristianina isika. Zary lasa kristianina mpanara-drenirano fotsiny no iantsoana antsika raha izany no misy sy mitranga. Mila manana fahasahiana manontany ny finoantsika isika. Fanontanina manambara ny fahavononantsika handalina azy bebe kokoa izany. Asaina hanontany azy amin’Andriamanitra na amin’ireo olona nanankinany antsika hitarika sy hanampy antsika amin’ny làlan’ny finoana.

Amin’ny sehatra rehetra eo amin’ny finoana anefa no mila iompanan’ny fanontaniantsika fa tsy sehatra tokana fotsiny ihany ka ireo mahafalifaly ihany ohatra no kitihina. Lesona azontsika hatsaraina ny hakanosan’ny apôstôly tsy sahy nametra-panontaniana rehefa niresaka mahakasika ny hijaliany sy ny hahafatesany i Jesoa Kristy. Manasa antsika hanara-dia an’i Kristy hamakivaky ny fijaliana hahatongavana amin’ny voninahitra anefa ny fahafantarana bebe kokoa ny finoantsika fa tsy mijanona amin’ny fahalalana fe fahalalana fotsiny ihany. Noho izany, hanampy be dia be antsika hananana fahavononana hanara-dia an’i Kristy na amin’ny mora na amin’ny sarotra ny fametrahantsika fanontaniana aminy.