2 septambra 2024 — Alatsinainy, Herinandro Tsotra faharoa amby roapolo Mandavantaona — Ny teninao, ry Tompo, no fahamarinana. Ankamasino amin’ny fahamarinana izahay — Evanjely Masina nosoratan’i Masindahy Lioka (Lk. 4, 16-30)

Ry kristianina havana; ny evanjelin’i MdLioka no vakina andavanandro manomboka izao herinandro 22 mandavantaona izao. I Jesoa ilay toa manome tombom-pitia ireo ahiliky ny fiarahamonina toy ny mpanota, ny ankizy, ny marary… Manomboka ny asany i Jesoa. Sinagoga, andro sabata ary Soratra Masina: ireo tontolon’ny fivavahana jody ireo koa iaingan’i Jesoa satria Izy no ilay Mesia fahatanterahan’ny fampanantenana hatrany aloha. Nohosoran’ny Ray tamin’ny Fanahy Masina Izy tamin’ny Batemy ary nirahiny hamonjy.

Indrisy anefa fa ilay olombelona ara-batana ihany no hitan’ny olona: zanak’i Josefa, avy any Nazareta. Hany ka tsy masina an-taniny ILay mpaminany lehibe, tsy nohenoina, nokasaina novonoina aza. Mila mihoatra ny ara-batana raha te hahatakatra an’Andriamanitra.

Rehefa mandà ny olona, rehefa manohitra ny olona, raha toa ka tsy mangetaheta ny olona, tsy afaka manao na inona na inona Andriamanitra. Tsy afaka ny hanao amboletra Izy, tsy afaka hanery na dia sitrapony aza ny hamonjy. Antso no ataony. Aoka hangetaheta famonjena isika fa izany koa no fanirian’Andriamanitra. Isika mangetaheta, isika noana, isika maniry fatratra no fepetra iray ahafahan’Andriamanitra miasa. Ka rehefa maniry Azy isika dia manokatra ny fontsika honenany. Dia tanteraka ny famonjena rehefa anjakany isika. Amen.