1 septambra 2024 — Alahady Tsotra faharoa amby roapolo Mandavantaona — Hanazava ny masom-panahintsika anie Andriamanitra, Rain’i Jesoa Kristy Tompontsika; mba hahalalantsika ny fanantenana niantsoany antsika — Evanjely Masina nosoratan’i Masindahy Marka (Mk. 7, 1-8a. 14-15. 21-23)

Ry havana; misy fifandroritana matetika eo amin’ny fomban-drazana (kolontsaina, fomba, fady…) sy ny Evanjely. Izany indrindra no adihevitr’i Jesoa sy ny manam-pahefana jody. Momba ny fahadiovana sy ny fisasana no resaka. Iaraha-miaiky fa antoky fahasalamana sy maha olom-banona ny fahadiovana. Fa ny fitsarana miaro fanamelohana na filazana fa fahotana mahafaty kosa ny tsy fanajana izany dia azo lazaina fa tafahoatra.

Faharoa manaraka izany dia mihoatra lavitra noho izany aza ny tenin’i Jesoa manitsy ireo Farisianiana sy mpahay lalàna jody. Ekena fa ilaina ny fahadiovan’ny vatana sy ny tena manontolo, ekena fa tena ilaina ny fahadiovan’ny fitaovana na fitafiana na fitaovam-pihinanana. Fa ny tena ilaina, hoy i Jesoa, dia ny fahadiovan’ny ao anaty, ny fo, ny saina, ny fanahy; izany no tena ilaina madio. Satria ratsy ny madio ivelany tahaka ny fasana fa fihatsaram- belatsihy. Ny fahadiovam-po, ny fitiavana, ny famindram-po no tsy maintsy katsahina indrindra; tsy am-bava sy imolotra fa amin’ny fiainana sy ny atao.

Tonga hatrany amin’ny fivavahana sy ny fifandraisana amin’Andriamanitra aza izany: tsy misy antony inona raha toa ka fombafomba sy endrika ivelany fotsiny ny fivavahana. Lasa ilay fomban’olombelona indray no mibahan-toerana. Mety ho latsaka amin’izany fakam-panahy izany isika raha tsy miezaka miaina ny torohevitry ny Evanjely. Aoka ampifanarahana ny hevitra tsara sy ny teny tsara ary ny fiainana tsara. Fiadiana amin’ny toetra ratsy mahazatra sy fanoherana ny fahotana mba ikolokoloana ny fahadiovam-po no ankasitrahan’Andriamanitra araka ny Salamo 23, Matio 5, 8 hoe izay madio fo no hahita an’Andriamanitra. Amen.