Sabotsy 28 marsa 2020 — Herinandro fahefatra amin'ny Karemy — Evanjely Masina nosoratan'i Masindahy Joany 7, 40-53 — Indro ankehitriny ny fotoana tsara, indro ankehitriny ny androm-pamonjena.

Ry kristianina havana, ny samy manam-pahefana ao amin'ny Jody no miady hevitra indray eto, araka ny Evanjely henontsika teo. Tsy mamela ny olona tsy hanana fanapahan-kevitra izany i Jesoa, izany hoe tsy maintsy miteny ny ao am-pony ny olona rehefa i Jesoa no resaka : na homba Azy, na hanohitra Azy. Ao amin'ny Evanjely dia misy ireo mahalala an-tsaina fotsiny ny fiaviany, fa tsy mino : avy any Betlehema, taranak'i Davida... fahalalana an-tsaina izany. Ao ireo nahita ny nataony sy nandre ny fampianarany, kanefa voarahona dia nangina. Ireo vahoka tsy mahay ny lalana, ka lazaina fa voahozona, ireo no nino an'i Jesoa.

Miharihary tokoa eto, fa tsy saina, na hambom-po, na fahaizana no ahafahana manatona an'Andriamanitra fa ny fo misokatra. Tsy izay mahay no masina, fa izay manaiky ny hakeliny ka miantehitra manontolo amin'Andriamanitra. Izany no atao hoe finona, ary izany tokoa i Jesoa teto an-tany. Tsy ny mahay sy ny hendry no nanatona azy, fa ny madinika, ireo mpanota voahilikilika, ny marary sy ny mahantra. Tsy araka ny fomban'olombelona mirenty voninahitra ny fanjakan'Andriamanitra fa amim-pitoniana, amim-pahatsorana. Mistery Andriamanitra, tsy araka izay vinavinain'ny saintsika no isehoany fa hafa. Inona no ataontsika eo anatrehan'izany ? Mivavaka tsy miato hoe : "Ambarao anay ny sitrakao, ry Ray, hotanterahinay". Amen.