3 nôvambra 2023 — Zoma, Herinandro Tsotra fahatelopolo Mandavantaona — ao tampina ny masoko, ry Tompo, hibanjina ny zava-mahagaga amin’ny lalànao — Evanjely Masina nosoratan’i Masindahy Lioka (Lk. 14, 1-6)

Miditra misakafo ao an-tranona Farisianina iray i Jesoa, ny Farisianina izay antokon’olona mifanandrina aminy matetika noho ny fandavan’izy ireo ny fomba vaovao entin’i Jesoa. Fa tsy mahasakana an’i Jesoa tsy handroso sy hiray latabatra, hiray vatsy hiray aina aminy izany satria ny olona rehetra no tian’i Jesoa vonjena; tsy mba manao an-dolompo ny fifandonana Izy fa mamelatra sy manatsotra tanana ary manokatra ny fony hidiran’ny olona. Manao soa sy mamonjy amin’ny fotoana rehetra.

Andro masina ny sabata ho an’ny Jody, andro fitsaharana ka voafetra ny asa azo atao sy ny halaviran-dalana azo aleha ary ny lanjan’entana azo entina. Ho an’i Jesoa kosa tsy misy andro fady ny famonjena; na ny sabata aza andron’ny Tompo, andron’ny Mpamonjy dia androm-pamonjena izany, androm-panafahana. Ny biby aza ve vonjena raha misy tranga mihatra aman’aina, mainka fa olombelona.

Te hiantrano ao amintsika i Jesoa, te hiray donak’afo hiray dinidinika, te hiray vatsy hiray aina ary te hanavao antsika, te hanasitrana antsika. Ampiantranoy ao am-pontsika izy. Raiso Izy ho Mpamonjy antsika isan’andro. Amen.