29 ôktôbra 2023 — Alahady Tsotra fahatelopolo Mandavantaona — Hankalazaina anie ny Mpanjaka avy, amin’ny Anaran’ny Tompo! Fiadanana anie any an-danitra, ary voninahitra anie any amin’ny avo indrindra — Evanjely Masina nosoratan’i Masindahy Matio (Mt. 22, 34-40)

Ry kristianina havana; entanin’ny litorjia isika amin’ny foto-kevitra hoe “tia an’Andriamanitra sy ny namana no maha kristianiana”. Henontsika tao amin’ny Evanjely teo ireo olona manontany an’i Jesoa, te haka fanahy Azy, te hitsapa ny fahaizany. Araka ny lovantsofina manko dia misy 613 ny karazana didy fampiharana ny didy folo. Ka ilay fanontaniana hoe inona no didy lehibe indrindra midika hoe iza amin’ireo didy ireo no tandremana dia ampy. Ny fitiavana an’Andriamanitra sy ny namana no navalin’i Jesoa. Raha zavatra iray no nanontanian’ilay mpanora-dalàna, zavatra roa tsy misaraka no valiny satria tsy mandeha ila fa mifameno ireo.

Ny fitiavana an’Andriamanitra no voalohany satria Izy no ambony indrindra, niandohana sy hiafaran’ny zavatra rehetra ka mendrika azy ny anjara toerana voalohany sy lehibe indrindra. Ny fitiavana ny namana no faharoa satria endrik’Andriamanitra ny namana. Tsy hoe mitovy laharana Andriamanitra sy ny namana ka nampilaharina fa fisehoan’ny fitiavana an’Andriamanitra ny fitiava-namana. Fampianarana sy toe-piainana vaovao nentin’i Jesoa eo amin’ny fiainan’ny Jody ny fitiava-namana milahatra amin’ny fitiavana an’Andriamanitra. Ny fitiavana ny namana hita maso no fisehoan’ny fitiavana an’Andriamanitra tsy hita maso, hoy ny fampianaran’i Masindahy Joany (1 Jo 4, 20-21).

Ary fitiavana no votoatiny satria ny fitiavana no mampisy dikany ny zavatra rehetra. Tsy hevitra tsara tefy, tsy kabary tsara lahatra fa toe-piainana aseho sy asa atao ny fitiavana. Aoka hitombo fitiavana isan’andro isika. Amen.