Alatsinainy 02 desambra 2019 - Herinandro voalohany amin'ny Fiavian'ny Tompo.
Evanjely Masina nosoratan'i Masindahy Matio 8, 5-11.
Ny Tompo no Mpanjakantsika, Izy no hamonjy antsika.
Mirakitra ny fanasitranan'i Jesoa ilay zazalahy marary sady malemy, zanaky ny kapiteny iray ny Vaovao Mahafaly androany. Ny finoana tokoa no mahavonjy. Izany hoe: ny finoana ihany no fototry ny fahasoavana rehetra ilain'ny fanahy amam-batana. Voalaza teo tena nampitolagaga an'i Jesoa mihitsy ny finoan'ity kapiteny iray ity. Izay marary tokoa andrianina.
Ao amin'ny fiainantsika ao an-tokantrano ao, raha vao misy marary ny zanaka, tahaka ny inona tokoa ny fikoropahan'ny ray aman-dreny. Atao daholo izao fomba rehetra izao mba hahasalama haingana ilay menaky ny aina:
- na inona na inona mety ho herintsika;
- na inona na inona mety ho fahefantsika;
- na ohatrinona na ohatrinona mety ho vola lanintsika;
- na ahoana na ahoana mety ho fari-pananantsika;
dia tsy misy afa-tsy i Jesoa irery ihany no kitro ifaharana amin'ny fahasalamana. Izy no ampinga farany satria an'Andriamanitra ny aina. Ary i Jesoa no tena mpitsabo mahasitrana ny aretintsika rehetra. Ao aminy no tena misy ny fanafody rehetra.
Tsetsatsetsa tsy aritra ihany, indraindray no hahenoana kristianina:
- mitady mpanao fanafody etsy sy eroa;
- ametrahan-tànana etsy sy eroa;
- mandeha mihotra etsy sy eroa;
- misy aza mahavita mandao ny finoana mihitsy noho ny fitsaboana.
Tandremo, riorio foana, hono, ny an'ny angidina. Ary aza mba manao dokotera tenany izany. Fa raha mahatsapa tena fa marary ianao, indrindra amin'ny ara-panahy, dia manatona mivantana an'i Jesoa amin'ny alalan'ireny solontenany hita maso ireny fa tsy misy mahavita tena izany eo amin'ny fiainana, fa fifanampiana mandrakariva. Ary ny mahery tsy maody, hono anie, tsy ela velona.
Masina Maria, fahasitranan'ny marary! Sitrano ny marary rehetra. Amen.
