4 jona 2023 — Alahady, Ny Trinite Masina — Fankalazana manetriketrika — Taona A — Voninahitra anie ho an’ny Ray sy ny Zanaka sy ny Fanahy Masina, Andriamanitra, Ilay ankehitriny sy taloha ary ho avy — Evanjely Masina nosoratan’i Masindahy Joany (Jo. 3, 16-18)

“Lehibe tokoa fitiavan’Andriamanitra an’izao tontolo izao nomeny zanany lahitokana mba tsy ho very izay rehetra mino azy fa hanana ny fiainana mandrakizay”. Miseho amin’ity Evanjely ity ny endrik’Ilay Andriamanitra fitiavana sy famindram-po. Miseho amin’ny alalan’ity zanany malalany ity ny famindram-pony sy ny fitiavany, tsy tonga hitsara na hanameloka fa hamonjy ny olona rehetra. Ka tsy endrik’Andriamanitra mpitsara sy masika teo amin’ny Testamenta Taloha intsony no hitantsika eto, fa Andriamanitra maneho fitiavana sy famindram-po, te hamonjy antsika, izay mamela ny helotsika olombelona.

Ary eto dia tsy hoe maniraka ny zanany tokana fotsiny Andriamanitra haneho ny endriny amintsika olombelona, fa tena miara-maiasa amin’izany ao anatin’ny fitiavana sy ny fiombonana ary ny fifanotronana amin’ny asa atao ho famonjena ny olombelona. Izany no toetran’ny Trinite Masina : mifankatia, mifampihaino, miombona ary mifanotrona amin’ny zavatra rehetra hahasoa ny olombelona. Ireo toetra ireo no tian’i Jesoa hananantsika manohy ny asany. Ka mazava àry eto ny teniny fa izay mino azy dia tsy hotsaraina, satria izay mino azy efa miaina ny fiombom-pitiavana tahaka ny Trinite Masina, efa mahay miombona sy miara-monina satria ao amintsika ny fitiavana, ary izay fitiavana izay no hitsarana antsika, ka inona indray ary no hitsaran’i Jesoa antsika amin’ny andro hihaonantsika Aminy, raha toa ka efa miaina ao antain’ny fitiavany tanteraka isika?

Koa mifampivavaha àry isika mianakavy mba hanjaka eo amintsika ny fifankatiavana sy ny firaisam-po amam-panahy tanteraka, ka hahatsapan’ny olona rehetra fa mino an’i Kristy tokoa isika.