Alarobia 26 febroary 2020 — Fanosorana lavenona — Evanjely Masina nosoratan'i Masindahy Matio 6, 1-6. 16-32 — Mibebaha ianareo fa efa akaiky ny Fanjakan'ny Lanitra.
Manomboka anio Alarobian’ny lavenona ny vanim-potoanan'ny karemy. Fotoana izay hankanesantsika any amin’ny Paka, fankalazana ny fandresena miaraka amin’i Kristy.
Ny Evanjely anio dia mampahatsiahy antsika an’ireo toetra izay takian’ny Eglizy mandritry ny karemy: ny asa fiantrana sy ny fivavahana ary ny fifadian-kanina. Ny tiana ambara mantsy dia ny hoe aoka Izy Andriamanitra irery ihany no hahita sy hahatsapa an’ireo toetra izay takiana amintsika ireo, fa tsy sahala an’ireo Farisianina sy mpanora-dalana izay ataony mihitsy izay hahitan’olona sy hahatsapana fa nanao izany izy ireo. I Jesoa mantsy efa nilaza hoe: "Raha tsy lehibe noho ny an’ny mpanora-dalana sy ny Farisianina ny fahamarinanareo dia tsy hiditra amin’ny fanjakan’ny lanitra ianareo".
Ny toetra takiana voalohany dia ny fanaovana asa fiantrana. Toetra izay mitondra mankany amin’ny fitiava-namana fa indrindra fa ireo mahantra sy ny madinika. Asa fiantrana izay hizarantsika ireo zavatra tiantsika amin’ny hafa: atao an-kafaliana tsy misy hanenenana. I Jesoa tsy niteny mihitsy hoe: "afeno ny asa fiantrana ataonao" fa aoka kosa mba tsy hilanao dera avy amin’ny hafa izany fa manjary efa voavaly sahady ny valisoantsika avy amin’ny Ray.
Ny toetra faharoa dia ny fitiavam-bavaka. Ny vavaka dia fotoana izay atolotsika an’Izy Andriamanitra. Fahafoizana fotoana izy io mariky ny fitiavantsika an’Andriamanitra sy hitondrantsika am-bavaka ny fiainantsika sy ny an'ny hafa.
Ny farany dia ny fifadian-kanina. Endrika iray izy io mba hahafahantsika manome toerana lehibe misimisy kokoa ny fiainam-panahy izay mampifandray antsika an’Andriamanitra.
Ny tanjona mantsy dia ny mba hialantsika eo ambanin’ny fanandevozan’ireo toetra ratsy izay nangeja antsika.
Araka izany àry, ny karemy dia hanasan’ny Eglizy antsika toy ny isan-taona mba hibebaka marina sy hanonitra ny fahotana vitantsika amim-panetren-tena. Irin’i Jesoa tokoa isika mba hanatanteraka izany am-pitiavana fa tiany ho mpandresy hiaraka aminy amin’izay fankalazana ny fotoana izay hitsanganany ho velona, dia ny Paka.
