Zoma 3 febroary 2023 — Herinandro Tsotra fahefatra Mandavantaona — Taona tsy ankasa — Ampianaro ahy, ry Tompo, ny soritrao; tariho amin’ny Fahamarinanao aho — Evanjely Masina nosoratan’i Masindahy Marka (Mk. 6, 14-29)

Ny filazan’i Masindahy Marka ny nahafatesan’i Joany Batista eto amin’ity Evanjely ity, dia maneho ny fomba nanoherana ireo mpaminany teo aloha sy izay mety hanjo ihany koa ireo Apôstôly na ireo kristianina, vavolombelon’ny finoana, mitory an’i Kristy.

Ireny toe-javatra ireny no maneho, fa tsy zavatra mandeha ho azy mantsy ny maha Apôstôly na ny maha kristianina fa mifaningotra mandrakariva amin’ny aina, izay tsy maintsy ijoroana ary iharetana hatramin’ny farany. Ny fiainantsika io toe-piainana io no maneho ny tena maha isika antsika eo anatrehan’Andriamanitra no sady hikatsahantsika mandrakariva an’izay notorìn’i Kristy dia ny hanorina ny Fanjakan’Andriamanitra.

Tsarovy anefa fa i Kristy no miharihary amin’izay iharetantsika noho ny anarany, ary sady fiombonantsika fijaliana aminy izany no koa fanohizana ny famonjena ny olombelona rehetra ankehitriny.

Efa tonga “Fanasina sy Fahazavana” noho ny finoana, isika, koa sahia mijoro ho Joany Batista vaovao, amin’izao andro diavintsika izao: ho sahy hanambara sy hijoro amin’ny marina sy tsy hiray tsikombakomba amin’ny ratsy ary ho vonona hijoro hatramin’ny farany na dia hihatra aman’aina aza.